ANG yuta nga gihatag sa Diyos ngadto sa Israel maoy usa gayod ka maayong yuta. Sa dihang si Moises nagpadalag mga espiya nga nag-una sa nasod aron suhiron ang Yutang Saad ug aron makakuhag pipila gikan sa mga abot niini, sila mipauli nga nagdalag mga igos, mga granada, ug usa ka bugway sa ubas nga dako kaayo mao nga duha ka tawo ang nagpas-an niini pinaagig yayongan! Bisan tuod sa kahadlok sila miatras gumikan sa kakulang ug pagtuo, sila mitaho: Ang yuta “sa pagkatinuod nagaagay sa gatas ug dugos.”​—Num 13:​23, 27.

Sa wala pa sila sa kataposan mosulod sa yuta, ang tigpamaba ni Jehova nagpasalig sa katawhan: “Si Jehova nga imong Diyos magdala kanimo ngadto sa usa ka maayong yuta, usa ka yuta sa bul-oganang mga walog sa tubig, sa mga tubod ug sa halawom nga katubigan nga nagaagay diha sa patag sa walog ug sa bukirong rehiyon, usa ka yuta sa trigo ug sebada ug sa mga paras ug sa mga igos ug sa mga granada, usa ka yuta sa lana nga olibo ug sa dugos . . . diin dili ka makulangan sa bisan unsa, usa ka yuta diin ang mga bato puthaw ug gikan sa mga bukid ikaw magmina ug tumbaga.” (Deu 8:7-9) Hangtod karong adlawa, ang yuta padayong namunga nga madagayaon.

Ang katahom ug kaanindot nianang karaan nga yutang saad makapainteres kanato karong adlawa. Ngano? Tungod kay ang Mesiyanikong mga tagna naggamit sa kadagaya nga gipanalangin ni Jehova sa karaang Israel aron iilustrar kon unsa ang buhaton sa Diyos alang sa tanang katawhan ilalom sa pagmando ni Jesu-Kristo, ang “Prinsipe sa Pakigdait.”​—Isa 9:6; Sal 67:​4-7; 72:16.