[Heb., di·shonʹ].

Usa ka nagapangusap nga hayop ug pikas ug kuko nga gihisgotan lamang sa Deuteronomio 14:​5, diin kini gilakip sa talaan sa mga hayop nga gitugot nga kan-on sa mga Israelinhon. Dili matino kon unsang hayopa ang gitumong sa Hebreohanong pulong nga di·shonʹ.

Ang addax antelope (Addax nasomaculatus) nga makaplagan pa gihapon sa desyertong mga rehiyon sa Amihanang Aprika sagad gituohan nga maoy katumbas sa di·shonʹ sa Hebreohanong Kasulatan. Kini nga antelope maoy mga 1 m (40 pul.) ang gihabogon taman sa abaga. Tungod sa kangkang, pikas nga mga kuko niini, kini makapanaw sa humokon nga mga balas sa desyerto diin kini makalahutay nga walay tubig sulod sa taas kaayong panahon. Ang nagbansiwag nga mga sungay niini nga hayop nagliyokliyok sama sa usa ka tuwerka, nga moliyok sa usa ug tunga hangtod sa halos katulo, ug may gitas-ong mga 1 m (40 pul.) kon sukdon subay sa kurba. Walay labot ang tiyan, ikog, likod ug ang pangulahing mga tiil niini, ug ingon man ang mga marka sa nawong nga kanunayng puti ang bulok, ang kolor sa addax antelope modagtom sa panahon sa tingtugnaw, ug mausab gikan sa pagkasamag-balas ngadto sa pagkakapehon. Ang laing posibilidad mao ang Arabianhong oryx (Oryx leucoryx), nga usa usab ka antelope sa desyerto.