Ang kinasidlakang bahin sa duha ka lumbay sa kabukiran nga naglangkob sa kabukiran sa Lebanon. Ang Kabukiran sa Anti-Lebanon maoy buyon sa Kabukiran sa Lebanon sa gilay-ong mga 100 km (60 mi), nga nagsukad sa patag ibabaw sa bukid sa Basan, sa S sa Dan, hangtod sa dakong Patag sa Emesa, nga dili layo gikan sa Ribla. Taliwala sa duha ka lumbay sa kabukiran nahimutang ang usa ka taas nga walog nga naporma tungod sa mga suba sa Orontes ug Litani ug gitawag nga Coele-Sirya (“Unlod nga Dapit sa Sirya”) o ang Beqaʽ.​—Jos 11:17.

Diha sa A ang tagaytay maoy hiktin ug gisal-angsal-angan sa lumbay sa habog nga mga tayuktok. Ang tungatungang bahin maoy mas dako, mas habog, ug mas gansangon, samtang ang habagatang bahin gitadlasan sa taas nga bul-oganang mga walog nga nagpaingon ngadto sa S ug sa H. Dapit sa S sa pangunang tagaytay adunay lumbay sa mga patag ibabaw sa bukid nga nag-anam ug kamubo hangtod nga milebel sa Kapatagan sa Damasco. Ang habagatang bahin naglakip sa Bukid sa Hermon, nga may gihabogong 2,814 m (9,232 p). Ang hitsura niining mga bukira maoy sama nianang sa Kabukiran sa Lebanon, ug kini pangunang gilangkoban sa anapog nga may dagtom nga mga pangpang ug sa dagtom, linginong mga tayuktok.

Ang Kabukiran sa Anti-Lebanon lagmit nga gitawag sa Hebreohanon sa ngalang “Amana” diha sa Awit ni Solomon 4:​8, diin kini gihisgotan uban sa Bukid sa Hermon. Bisan tuod giisip sa pipila nga ang Amana maoy lain nga bukid, mopatim-awng kini lagmit mao ang tibuok nga Kabukiran sa Anti-Lebanon o usa ka bahin niana. Ang kabukiran sa “Libana” ug “Ammanana” gihisgotan nga magkauban diha sa mga inskripsiyon sa Asiryanhong mga monarko nga si Tiglat-pileser III ug Senakerib. Ang Suba sa Abana (modernong Barada) gitawag usab nga “Amana” diha sa 2 Hari 5:12 sa Syriac nga Peshitta ug sa Aramaiko nga mga Targum, ug kini nga suba, nga maoy panguna sa Damasco, naggikan sa habagatang bahin sa kabukiran sa Anti-Lebanon. Sa ingon kining ngalana mahimong magtumong niana nga bahin sa kabukiran o sa tibuok nga kabukiran.

Sanglit ang tayuktok sa dakong bahin sa Kabukiran sa Anti-Lebanon wala maputos sa niyebe, diyutay lamang ang mga suba ug mga sapa niini. Diyutay lamang nga katanoman ang nanubo, apan may hilang nga kakahoyan sa mugbong robles ug junipero nga makita diha sa lainlaing dapit sa mga kabakiliran. Pipila na lang ka sedro ang nahibilin karong adlawa. Ang ubos nga bahin sa kabakiliran angayan gihapon sa pagtanom ug mga parasan, kaolibohan, ug mga prutasan, maingon sa kapanahonan sa Bibliya.