Usa ka kinutaang tinukod sa Jerusalem nga nagsilbing kuwartel sa mga sundalo. Sumala ni Josephus, kini adunay mga kuwarto, kaligoanan, baraks, ug mga sawang.​—HULAGWAY, Tomo 2, p. 535.

Ang Torre sa Antonia nahimutang sa AK nga eskina sa sawang sa templo ug lagmit nga nag-okupar sa luna diin si Nehemias una pa niana nagtukod sa Kastilyo (o kuta) nga gihisgotan sa Nehemias 2:8. Si Herodes nga Bantogan mihimog dako ug gastoso nga pag-ayo niini ug nagpalig-on sa mga kuta niini. Kaniadto kini nailhang Baris, apan si Herodes nagngalan niini nga Antonia agig pagpasidungog kang Mark Antony. Ingon sa gihimo sa Hudiyong hataas nga saserdote ug magmamando nga si John Hyrcanus una pa kaniya, si Herodes nagbutang sa mga besti sa mga saserdote didto, lagmit aron padayon niyang mabantayan o makontrolar ang hataas nga saserdote.

Sumala ni Josephus, ang kuta gitukod diha sa usa ka nagbuntaog nga bato nga 50 ka maniko (mga 22 m; 73 p) ang gihabogon. Ibabaw sa bato, kini adunay mga paril nga bato nga 40 ka maniko (mga 18 m; 58 p) ang gihabogon ug adunay upat ka torre sa eskina, ang tulo niini maoy 50 ka maniko (mga 22 m; 73 p) ang gihabogon ug ang usa, diha sa habagatan-sidlakang eskina nga nag-umbaw sa tibuok dapit sa templo, maoy 70 ka maniko (mga 31 m; 102 p) ang gihabogon. (The Jewish War, V, 238-247 [v, 8]) Una pa sa panahon ni Herodes ang kuta pangunang gigamit ingong panalipod sa mga pagpanulong gikan sa A, apan human niadto kini pangunang gigamit ingong dapit sa pagkontrolar sa mga Hudiyo ug ingong dapit sa pagbantay sa mga kalihokan sa dapit sa templo, diin adunay direktang agianan gikan sa kuta.

Ang kuwadrado nga porma sa kuta nagpailang kini adunay sawang sa tunga. Ang pipila nagtuo nga diha sa maong kinatung-ang sawang sulod niini nga torre nga si Jesus miatubang kang Pilato alang sa paghukom. (Ju 19:13) Ilang gituohan nga ang salog nga bato nga makaplagan niining dapita mao ang gihisgotan nga “Gabbatha.” Apan, ang uban nagtuo nga ang paghukom ni Pilato kang Jesus gihimo sa atubangan sa palasyo ni Herodes.​—Tan-awa ang SALOG NGA BATO.

Ang mas tinong paghisgot sa Torre sa Antonia mao kanang girekord sa Buhat 21:30-40 ug 22:24. Mopatim-awng si Pablo mipahayag sa iyang depensa ug pamatuod ngadto sa usa ka magubtanon nga relihiyosong panon gikan sa hagdanan sa kuta ug human niadto gidala ngadto sa kuwartel sa mga sundalo aron sukitsukiton. Lagmit nga si Pablo gibalik niining dapita human sa gubot nga pakig-atubang niya sa Sanhedrin ug dinhi usab nga ang iyang pag-umangkon nga lalaki nagpasidaan kaniya bahin sa panagkunsabo batok sa iyang kinabuhi.​—Buh 23:​10, 16.

Ang Torre sa Antonia sa kataposan nagun-ob sa dihang si Heneral Tito sa Roma naglaglag niini lakip sa templo ug sa siyudad niadtong 70 K.P.