Ang duha ka bahin sa nawong ibabaw sa apapangig ug ubos sa mata; sa Hebreohanon kini maoy lechiʹ, ug sa Grego si·a·gonʹ. Ang Bibliya naghisgot sa pagtamparos sa aping dili aron sa pagpahinabog pisikal nga kadaot kondili aron sa pagbadlong, pagpakaulaw, o pag-insulto. Busa ang manalagna ni Jehova nga si Micaias gitamparos tungod sa pagtagna ug daotang mga panghitabo batok sa daotan nga si Haring Ahab sa Israel. (1Ha 22:24; 2Cr 18:23) Ingong pakaulaw, si Job gitamparos niadtong wala motahod ug nagbiaybiay kaniya sa panahon nga siya gisulayan ni Satanas.​—Job 16:10.

Ang mga manalagnang si Isaias ug Miqueas nagtagna labot sa paghampak sa aping sa Mesiyas ug sa pag-ibot sa buhok gikan sa iyang mga aping, tanan nagpasabot sa mapait nga pakaulaw nga ipahamtang sa iyang mga kaaway nganha kaniya. (Isa 50:6; Miq 5:1) Natuman kini diha kang Jesu-Kristo pinaagi sa mga Hudiyo sa dihang siya gihusay atubangan sa Sanhedrin ug sa ulahi pinaagi sa Romanong mga sundalo una pa siya patya diha sa estaka sa pagsakit. (Mat 26:​67, 68; Ju 18:​22, 23; 19:3) Apan si Jesus wala mobalos maingon sa gihimo kaniya o mitubag ug sakit, masuk-anong mga pulong.

Gitambagan ni Jesus ang iyang mga tinun-an: “Nadungog ninyo nga kini giingon, ‘Mata alang sa mata ug ngipon alang sa ngipon.’ Bisan pa niana, ako magaingon kaninyo: Ayaw sukli siya nga daotan; apan si bisan kinsa nga mosagpa kanimo sa imong tuo nga aping, itahan mo usab kaniya ang pikas.” (Mat 5:​38, 39) Si Jesus dinhi wala magtudlo sa tinamdan nga dili mosukol o nagsalikway sa katungod sa pagpanalipod sa kaugalingon gikan sa pisikal nga kadaot, apan siya nagtudlo nga ang usa ka Kristohanon dili angayng mobalos ug hapak tungod sa hapak o manimalos. Iyang gisilsil ang prinsipyo sa paglikay sa mga panag-away pinaagi  sa dili pagtubag o pagbuhat sa susama. Ang pagsagpa sa aping wala himoa aron sa pagpahamtang ug pisikal nga kadaot kondili aron sa pag-insulto lamang o sa paghagit ug panag-away. Si Jesus wala mag-ingon nga kon ang usa ka tawo maghampak sa usa ka Kristohanon sa apapangig, siya mobangon ug itaon ang pikas bahin sa iyang nawong aron dapatan. Ang gipasabot ni Jesus mao nga kon adunay usa ka tawo nga manghagit ug panag-away o panaglalis sa usa ka Kristohanon pinaagig pagsagpa kaniya o pagsultig insulto kaniya, sayop ang pagbalos. Nahiuyon kini sa gipamulong sa mga apostoles, nga dugang nagpasiugda niini nga prinsipyo.​—Rom 12:17-21; 1Pe 3:9.