Usa ka tiyanggihan nga 64 km (40 mi) sa HS sa Roma. Kini maoy usa ka iladong hunonganan diha sa gibantog nga Romanhong dakong dalan nga Via Appia, nga naggikan sa Roma hangtod sa Brundisium (gitawag karon nga Brindisi) agi sa Capua. Ang ngalan sa dalan ug sa tiyanggihan naggikan sa ngalan sa nagtukod niini, si Appius Claudius Caecus, sa ikaupat nga siglo W.K.P.

Ingong naandang hunonganan sa mga magpapanaw pagkatapos sa unang adlaw nga pagbiyahe gikan sa Roma, kini nga puwesto nahimong puliki nga sentro sa patigayon. Nakadugang pa sa kahinungdanon niini mao ang nahimutangan niini diha sa amihanang tumoy sa usa ka kanal nga nagaagos ubay sa dalan nga milatas sa Pontine Marshes. Gitaho nga ang mga magpapanaw isakay sa mga sakayan nga guyoron sa mga mula agi niini nga kanal panahon sa kagabhion. Ang Romanong magbabalak nga si Horace naghubit sa kalisod sa biyahe, nga nagreklamo tungod sa mga baki ug mga tagnok ug naghulagway sa Tiyanggihan sa Apio ingong nagdasok sa “mga sakayanon ug sa hangol nga mga magbalantay sa abotanan.”​—Satires, I, V, 1-6.

Dinhi niining puliki nga kinasang-an sa dalan nga si apostol Pablo, nga mipanaw gikan sa Puteoli paingon sa Roma ingong binilanggo, unang nakahibalag sa delegasyon sa Kristohanong mga igsoon kinsa, sa pagkadungog sa balita nga siya moabot, mibiyahe gikan sa Roma aron sa pagsugat kaniya. Ang pipila niini nga delegasyon naghulat didto sa Tulo ka Abotanan (15 km [9.5 mi] nga mas duol sa Roma) samtang ang uban mipadayon hangtod sa Tiyanggihan sa Apio.​—Buh 28:15.

Karong adlawa aduna gihapoy dapit nga gitawag ug Foro Appio, o Appian Forum, diha sa Apyanhong Dalan. Usa ka timailhang poste ang nagpaila sa dapit diin ang Tiyanggihan sa Apio nahimutang kanhi. Adunay usa ka gamayng lungsod sa banika nga gitawag ug Faiti tabok sa Apyanhong Dalan.