Ang mga ngalang Arabo ug Arabiano diha sa Kasulatan pangunang gigamit sa halapad nga diwa nga nagtumong sa usa ka molupyo sa Arabia, ang dakong yuta dapit sa S ug H sa Palestina. Usahay ang konteksto ug ang paggamit niini nagtumong sa usa ka espesipikong tribo o etnikong grupo.​—1Ha 10:15; 2Cr 9:14; 21:16.

Ang daghang tribo sa Arabia maoy Semitikanhon, nga naggikan kang Sem pinaagi kang Joktan; ang uban maoy Hamitikanhon, nga naggikan sa anak nga lalaki ni Ham nga si Cus. (Gen 10:​6, 7, 26-30) Ang pipila sa mga kaliwat ni Abraham pinaagi kang Agar ug Ketura mipuyo usab sa Arabia, sama sa mga anak ni Ismael nga “nanimuyo gikan sa Havila duol sa Sur, nga didto sa atubangan sa Ehipto, hangtod sa Asirya.” (Gen 25:1-4, 12-18) Ang mga kaliwat ni Esau nga nagpuyo sa bukirong rehiyon sa Seir maoy lakip usab sa katibuk-ang klasipikasyon sa mga Arabiano.​—Gen 36:1-43.

Sa kinadak-ang bahin, ang mga Arabiano maoy katawhang tigbalhinbalhin ug puyo, tigbuhig kahayopan, ug nagpuyo sa mga tolda. (Isa 13:20; Jer 3:2) Hinuon, ang uban maoy mga negosyante ug ang pipila gihisgotan ingong mga magpapatigayon sa Tiro. (Eze 27:21) Ang mga alagad sa Diyos sa makadaghan nakiglabot kanila. Ang mga magpapatigayon nga Midianhon nga nagpaingon sa Ehipto nga gibaligyaan kang Jose maoy mga Arabiano, mao man usab ang mga Sabeanhon gikan sa H sa Arabia nga misulong sa bakahan ug sa mga asna ni Job. (Gen 37:28; Job 1:​1, 15) Sulod sa ilang 40-ka-tuig nga panaw sa kamingawan ang mga Israelinhon nakaagom ug katalagman tungod sa ilang pagpakiglabot sa mga Midianhon nga magsisimba kang Baal (Num 25:​6, 14-18), ug sa panahon sa mga Maghuhukom, ang panon sa nagsakay ug kamelyo nga mga Arabiano kanunayng misulong sa Israel sulod sa pito ka tuig hangtod nga si Maghuhukom Gideon grabeng nagpildi kanila.​—Huk 6:1-6; 7:12-25.

Ang mga magmamando sa mga gingharian sa Arabia nagbayad ug tributo kang Haring Solomon. (1Ha 10:15; 2Cr 9:14) Ang mga Arabo nagbayad ug tributo kang Jehosapat nga 7,700 ka laking karnero ug sa samang gidaghanon sa mga laking kanding, apan sa ulahi sila nakig-alyansa sa mga Filistehanon batok sa anak nga lalaki ug manununod ni Jehosapat nga si Jehoram, nga ang ilang pundok sa mga bandido nagpatay ug daghan sa iyang mga anak. (2Cr 17:11; 21:16; 22:1) Si Uzzias malamposong nakiggubat kanila sa panahon sa iyang paghari. (2Cr 26:​1, 7) Ang Arabianong mga magsusupak maoy lakip sa nagpalisod kang Nehemias sa panahon sa pagpasig-uli sa mga paril sa Jerusalem.​—Neh 2:19; 4:​7, 8; 6:1.

Bisan tuod tigbalhinbalhin ug puyo, sa kinatibuk-an independente, ug sagad nga nahimulag sa pangunang kalihokan sa maong mga panahon, ang mga Arabo nakadawat ug matagnaong pagtagad ug paghukom sa Diyos. (Isa 21:13; Jer 25:17-24) Kasiglohan sa ulahi, ang pipila ka Arabiano lagmit nga lakip niadtong nahimong mga membro sa unang Kristohanong kongregasyon panahon sa Pentekostes.​—Buh 2:​11, 41; tan-awa ang ARABIA.