1. Usa sa mga pangulo sa tribo ni Benjamin kinsa sa usa ka higayon mipuyo sa Jerusalem.​—1Cr 8:​15, 28.

2. Usa ka siyudad sa habagatang utlanan sa Canaan kansang hari miatake sa Israel samtang sila nagsingabot sa Canaan. Ang mga Israelinhon nagtugyan sa distrito ngadto sa kalaglagan ug nagtawag niini nga “Horma,” nga nagkahulogang “Pagtugyan Ngadto sa Kalaglagan.” (Num 21:1-3; 33:40) Apan, wala sila mopuyo didto niadtong higayona ug dayag nga dihay pipila sa mga molupyo nga nakaikyas sa kalaglagan. Busa, ang hari sa Arad gilakip sa talaan sa 31 ka hari nga sa ulahi gibuntog sa matulin nga pagpakiggubat ni Josue. (Jos 12:14) Ang mga Kenihanon sa ulahi nanimuyo sa dapit sa kamingawan sa H sa Arad.​—Huk 1:16.

Ang Israelinhong Arad gituohan sa kadaghanan nga mao ang Tel ʽArad, usa sa kinadak-ang mga bungdo sa rehiyon sa Negeb. Kini nahimutang sa medyo hanayhay nga patag nga mga 28 km (17 mi) sa S sa Beer-seba. Ang mga pagpangubkob didto sa Tel ʽArad nakakaplag ug mga 200 ka ostracon o bika nga may mga inskripsiyon, halos katunga niini diha sa Hebreohanon ug ang uban diha sa Aramaiko. Usa sa maong mga bika nga may inskripsiyon nga Hebreohanon nga giingong  sukad pa sa ikaduhang katunga sa ikapitong siglo W.K.P., mabasa: “Ngadto sa akong ginoo nga si Eliasib: Hinaot si Jehova mangayo sa imong kalinaw. . . . Siya nagapuyo sa balay ni Jehova.”​—HULAGWAY, Tomo 1, p. 325.

Tungod kay walay nakaplagang mga nahibilin sa ulahing mga Canaanhon didto sa Tel ʽArad, si Y. Aharoni nagsugyot nga ang Canaanhong Arad nahimutang sa Tell el-Milh (Tel Malhata), 12 km (7 mi) sa HK sa Tel ʽArad.