Ang Jebusihanon nga tag-iya sa giokanan nga gipalit ni Haring David aron tukoran ug halaran alang kang Jehova. Gihimo niya kini agig pagsunod sa instruksiyon sa Diyos aron mohunong ang hampak nga misangpot tungod sa pag-ihap ni David sa katawhan.​—2Sa 24:16-25; 1Cr 21:15-28.

Lagmit gitanyag ni Arauna nga walay bayad ang maong dapit uban sa baka ug sa mga galamitong kahoy alang sa paghalad, apan si David miinsistir sa pagbayad. Ang rekord sa 2 Samuel 24:24 nagpakita nga gipalit ni David ang giokanan ug ang baka sa 50 ka siklong plata ($110). Apan, ang asoy sa 1 Cronicas 21:25 nag-ingon nga si David nagbayad ug 600 ka siklong bulawan (mga $77,000) alang sa maong dapit. Ang magsusulat sa Ikaduhang Samuel nagtumong lamang sa pagpalit sa nahimutangan sa halaran ug sa mga materyales alang sa paghalad nga gihimo niadtong higayona, ug busa mopatim-aw nga ang bili sa pagpalit nga iyang gihisgotan maoy alang lamang niining mga butanga. Sa laing bahin, gihisgotan sa magsusulat sa Unang Cronicas ang mga butang labot sa templo nga sa ulahi gitukod sa maong dapit ug gilangkit ang pagpalit uban niana nga pagtukod. (1Cr 22:1-6; 2Cr 3:1) Sanglit dako man kaayo ang katibuk-ang luna sa templo, mopatim-aw nga ang kantidad nga 600 ka siklong bulawan nagtumong sa pagpalit niining dakong luna imbes nga sa gamayng bahin nga gikinahanglan alang sa halaran nga unang gitukod ni David.

Usa ka samag-dulang nga bato ang makita hangtod karon ilalom sa Muslim Dome of the Rock nga nahimutang sa usa ka bahin sa orihinal nga gitukoran sa templo, ug lagmit kining batoha nagtimaan sa unang giokanan ni Arauna.

Sa rekord sa Mga Cronicas si Arauna gitawag nga Ornan.​—1Cr 21:18-28; 2Cr 3:1.