[Bungtod ni Ares; Bungtod ni Mars].

Usa ka bungtod dapit sa AK sa nagbuntaog nga Acropolis sa Atenas, nga taliwala niini adunay usa ka mabaw nga walog. Kining hiktin, umaw nga tagaytay nga anapog maoy 113 m (370 p) ang gihabogon ug ang Acropolis dapit sa HS niini mas habog pa ug 43 m (141 p). Ang agianan paingon sa Bungtod ni Mars maoy hanayhay dapit sa A; sa H kini maoy titip. Dihay panahon nga sa tumoy niining bungtora nahimutang ang Gresyanhong mga halaran, mga sangtuwaryo sa templo, mga estatwa, ug ang korte suprema sa Areopago. Karong adlawa kining tanan nahanaw na ug pipila na lamang ang nahibilin sa mga bato nga gipormang mga lingkoranan.

Sa usa sa mga pagduaw ni apostol Pablo sa Atenas, ang pipila ka taga-Atenas nagdakop kaniya ug nagdala kaniya ngadto sa Areopago, nga nag-ingon: “Mahimo ba namong masayran kon unsa kining bag-ong pagtulon-an nga imong gipamulong? Kay ikaw nagpahayag ug pipila ka butang nga dili sinati sa among mga igdulungog.” (Buh 17:​19, 20) Sa pagtubag, mainampingon ug tagsatagsang gihan-ay ni Pablo ang lig-ong mga kamatuoran, nga migamit ug lohikal, makadani, ug makapakombinsir nga argumento. Wala mahuman ni Pablo ang iyang pakigpulong, kay “sa dihang sila nakadungog bahin sa pagkabanhaw sa mga patay” ang mga tigyagayaga misugod sa pagyagayaga kaniya. Apan, sa dihang nahitabo kini nga pagsalga, ang apostol milampos na sa pagbahin sa mga opinyon sa iyang mga mamiminaw sa tulo ka paagi. Samtang ang pipila nagyagayaga, ang pipila miingon nga sila mamati ra ug dugang sa laing higayon, ang uban “nahimong mga magtutuo, apil kanila usab mao si Dionisio, usa ka maghuhukom sa korte sa Areopago, ug usa ka babayeng ginganlag Damaris, ug uban pa gawas kanila.” (Buh 17:22-34) Sa paghandom niini nga hitabo sa Bukid ni Mars, may usa ka bronse nga plake karon didto nga naundan niini nga pakigpulong ni apostol Pablo. Dili gayod matino kon si Pablo namulong ba nianang okasyona diha sa atubangan sa korte sa Areopago, apan labing menos may usa ka membro nianang iladong korte ang diha taliwala sa iyang mga mamiminaw.​—HULAGWAY, Tomo 2, p. 746.