[Hamili; Maayo Kaayo].

Ang kataposan sa ubay-ubayng Arabiano nga mga hari nga nagbaton niining ngalana kinsa maoy nagkontrolar sa Damasco sa panahon nga ang gobernador niining siyudara miduyog sa laraw sa mga Hudiyo sa pagpatay kang Pablo. Si apostol Pablo nakaikyas sakay sa usa ka bukag nga gitunton gikan sa bentana sa paril sa siyudad.​—Buh 9:23-25; 2Co 11:​32, 33.

Gihatag ni Aretas sa kaminyoon ang iyang anak nga babaye kang Herodes Antipas (tan-awa ang HERODES Num. 2), kinsa nagdiborsiyo kaniya aron makigminyo kang Herodias​—ang mananapawong relasyon nga gihukman ni Juan nga Tigbawtismo. (Mat 14:​3, 4) Kay misamot ang kasuko tungod sa mga kasungian sa utlanan, si Aretas misulong ug  bug-os nagpildi kang Antipas. Dayon si Emperador Tiberio nagsugo sa gobernador sa Sirya nga si Vitellius sa pagdakop kang Aretas patay kon buhi. Si Vitellius, nga dili pod higala ni Antipas, nagpalihok sa iyang kasundalohan, apan si Tiberio namatay niadtong 37 K.P., ug mao nga gihunong ang pagpakiggubat batok kang Aretas. Giusab sa manununod ni Tiberio nga si Caligula kining langyaw nga polisa, gipalingkod si Herodes Agripa I puli kang Antipas, ug gitugotan si Aretas sa pagmando sa Damasco. Usa ka sensilyo sa Damasco nga may inskripsiyon bahin kang Aretas ang gipetsahan niining yugtoa.