[Ang Diyos Naghimo].

1. Usa ka anak nga lalaki sa igsoong babaye ni David o sa iyang igsoong babaye sa inahan nga si Zeruia ug igsoon ni Abisai ug Joab; busa, pag-umangkon ni David. (1Cr 2:​15, 16) Gipasidunggan ingong lakip sa 30 ka talagsaong manggugubat ilalom ni David, si Asahel nailhan ilabina tungod sa iyang katulin, “sama sa usa sa mga gasela nga anaa sa kapatagan.” (2Sa 2:18; 23:24) Kini maoy nagpapukan kaniya. Human sa panagtigiay didto sa Linaw sa Gabaon ug sa misunod nga pagkapildi sa mga kasundalohang Israelinhon ilalom ni Abner, si Asahel matubayong migukod sa mikalagiw nga si Abner. Human si Asahel hangyoa sa paghunong sa duha ka higayon, ang kusgang si Abner miduslak sa pangulahiang tumoy sa iyang bangkaw sa tiyan ni Asahel, ug si Asahel namatay dihadiha. Bisan tuod gipahunong ni Joab nga igsoon ni Asahel ang kasundalohan sa Juda sa pagpakig-away ingong sanong sa pagtutol ni Abner, ang pagkamatay ni Asahel nakahatag ug kapait sa kahiladman ni Joab mao nga sa ulahing higayon siya malansisong nagmaniobra aron mapatay si Abner pinaagi sa espada.​—2Sa 2:12-28; 3:22-27.

Sa 1 Cronicas 27:7 si Asahel gilista ingong komandante sa usa ka dibisyon sa binulan nga kahikayan sa kasundalohan. Sanglit namatay si Asahel sa wala pa maghari si David sa tibuok Israel, ang paghisgot kaniya dinhi lagmit maylabot sa iyang panimalay, nga gihawasan sa iyang anak nga lalaki nga si Zebadias, nga gipaila sa teksto ingong manununod ni Asahel. Ang laing posibilidad mao ang gihisgotan sa The Interpreter’s Dictionary of the Bible (giedit ni G. A. Buttrick, 1962, Tomo 1,  p. 244): “Posible nga kita dunay hulad dinhi sa mga sundalo ni David, nga giorganisar sa unang yugto sa pagmando sa hari sa Juda, ug nga kining orihinal nga listahan gibag-o pinaagi sa pag-apil kang Zebadias, anak nga lalaki ug manununod ni Asahel niini nga katungdanan.”​—Itandi ang 1Cr 12.

2. Usa sa mga Levihanon nga gitudlo aron magtudlo sa Balaod sa tibuok Juda, sugod sa ikatulong tuig sa paghari ni Jehosapat (934 W.K.P.).​—2Cr 17:​7, 8; itandi ang Deu 33:8-10.

3. Usa ka komisyonado nga nag-alagad sa templo panahon sa paghari ni Ezequias (745-717 W.K.P.) maylabot sa mga amot ug ikapulo.​—2Cr 31:13.

4. Ang amahan sa usa ka Jonatan nga katalirongan ni Esdras.​—Esd 10:15; tan-awa ang JAZEIAS.