[Malipayon; Kalipay].

1. Ang ikawalong anak nga lalaki ni Jacob ug ang ikaduha sa iyang duha ka anak kang Zilpa, nga sulugoong babaye ni Lea. (Gen 35:26) Busa ang bugtong pursoso nga igsoon ni Aser mao si Gad. Ang upat ka anak nga lalaki ni Aser ug ang usa niya ka anak nga babaye gitala sa 1 Cronicas 7:​30, bisan tuod wala hinganli ang iyang asawa. Dili siya  prominente sa 12 ka anak nga lalaki ni Jacob. Bisan pa niana, sa tagna sa iyang himalatyon nga amahan, gisaaran si Aser ug usa ka kinabuhi nga panalanginan sa dagayang matambok nga mga pagkaon (Gen 49:20), ug ang kasaysayan sa iyang mga kaliwat nagpamatuod sa katumanan niining tagnaa.

2. Ang ngalan gigamit usab alang sa tribo nga naggikan kang Aser. Usa ka tuig human sa Pagpanggula gikan sa Ehipto ang hingkod nga lalaking mga kaliwat sa tribo adunay gidaghanong 41,500 (Num 1:41) ug, mga 39 ka tuig sa ulahi, miuswag ngadto sa 53,400, mao nga nahimo kining ikalima sa kinadaghanag sakop nga tribo. (Num 26:47) Sa kampo sa Israel, ang Aser nag-okupar sa A sa tabernakulo, kauban sa mga tribo ni Dan ug Neptali.​—Num 2:25-30.

Sa wala pa mosulod sa Canaan, ang matagnaong panalangin ni Moises nagtagna pag-usab sa usa ka malamboon nga bahin alang sa Aser. Ang tribo sa malarawanon ‘nagtuslob sa tiil niini diha sa lana.’ (Deu 33:​24, 25; itandi ang Job 29:6.) Ang pahat sa ilang teritoryo miabot ubay sa kapatagan daplin sa baybayon sa Mediteranyo gikan sa ubos sa lungsod sa Dor, sa H sa Bukid sa Carmelo, hangtod sa A nga utlanan sa Palestina didto sa Sidon. (Jos 17:7-11; 19:24-31) Lakip niini ang pipila sa labing tabunok nga yuta sa tibuok Israel, diin ang mga kahoyng olibo magtaganag dagayang lana, samtang ang ubang mga bunga magtaganag lamiang mga pagkaon nga takos idulot sa usa ka harianong lamesa. (Gen 49:20; Deu 33:24) Ang mga teritoryo sa Zabulon ug Neptali nahimutang ubay sa S nga utlanan sa Aser, kauban sa Manases ug Isacar sa H ug sa HS.

Gihisgotan ang Aser sa Josue 17:7 nga nahimutang sa utlanan sa tribo ni Manases. Gihisgotan usab ang Aser niining sama nga asoy diha sa bersikulo 10, diin kini tin-awng nagtumong sa tribonhong teritoryo sa Aser.