1. Ang unang ginganlan sa tulo ka anak nga lalaki ni Gomer, nga anak nga lalaki ni Japet.​—Gen 10:3; 1Cr 1:6.

Diha sa Hudiyohanong mga sinulat sa mga panahon sa Edad Medya (ug bisan human niana) ang terminong “Askenaz” nagtumong sa Teutonikong rasa, ug mas espesipiko ngadto sa Alemanya. Busa, bisan karon ang mga Hudiyo gikan sa mga nasod nga Alemanhon gitawag ingong mga Askenazim agig pagpalahi sa mga Separdim, mga Hudiyo gikan sa Espanya ug Portugal.

2. Ang Jeremias 51:27 naghisgot sa usa ka gingharian sa Askenaz nga nakig-alyansa sa mga gingharian sa Ararat ug Mini batok sa Babilonya sa panahon nga kini napukan (539 W.K.P.). Sanglit ang Ararat gituohan nga nahimutang sa rehiyon sa Lanaw sa Van, ug ang Mini (gihisgotan ingong “Mannai” diha sa Asiryanhong mga inskripsiyon)  giisip nga nahimutang sa HS sa Lanaw sa Van, lagmit nga ang gingharian sa Askenaz nahimutang duol niini nga mga rehiyon, tingali sa may A sa usa ka dapit taliwala sa Itom nga Dagat ug sa Dagat Caspian.

Ang ngalang Askenaz giisip sa mga arkeologo ingong katumbas sa Asiryanhong Ashguzai, nga lagmit nagtumong sa karaang mga Sityanhon nga nanimuyo sa mga dapit duol sa Itom nga Dagat ug sa Dagat Caspian. Ang cuneiform nga mga papan nagrekord sa pakig-alyansa tali niini nga tribo ug sa Mannai (Mini) diha sa usa ka pag-alsa batok sa Asirya sa ikapitong siglo W.K.P.