Usa ka siyudad sa rehiyon sa Basan, nga gituohan sa kadaghanan karong adlawa nga mao ang Tell ʽAshtarah nga mga 32 km (20 mi) sa S sa Dagat sa Galilea. Ang mubo nga bungtod didto gipalibotan sa usa ka maayong pagkatubig nga patag. Ang ngalan niini lagmit nagpaila nga kini kanhi maoy usa ka sentro sa pagsimba sa diyosa nga si Astoret.

Ang Biblikanhong mga paghisgot niini sa panguna maoy bahin sa higante nga si Haring Og sa Basan, kinsa gihisgotang naghari “sa Astarot, sa Edrei.” (Deu 1:4; Jos 9:10; 12:4; 13:12) Ang nasakop nga teritoryo sa gingharian ni Og sa sinugdan gipahat ngadto sa mga Makirnon sa tribo ni Manases, apan ang Astarot sa ulahi gipasa ngadto sa mga Gersonhon ingong usa ka Levihanong siyudad. (Jos 13:29-31; 1Cr 6:71) Sa Josue 21:​27, nga katumbas sa asoy sa 1 Cronicas 6:​71, ang siyudad gitawag ug Beestera.

Kini nga siyudad gihisgotan sa Asiryanhong mga inskripsiyon ug sa mga Papan sa Amarna.