1. Usa ka anak nga lalaki ni Sem, ang ikaduha nga ginganlan diha sa Genesis 10:22 ug 1 Cronicas 1:17. Siya mao ang katigulangan sa mga Asiryanhon, ug ang samang Hebreohanong pulong gihubad nga “Asur” ingon man “Asirya(nhon).” Ang ilang nasod o kaha ang usa sa pangunang mga siyudad niini, ang Asur (modernong Qalʽat Sherqat), mao ang gipasabot sa Ezequiel 27:23.

2. Ang pangunang diyos sa mga Asiryanhon, ang ilang diyos sa militaryong katakos, nga kaniya kining katawhan nga gustong makiggubat nagaampo alang sa tabang. Si Asur maoy usa ka “patriarka nga gipakadiyos,” ug sa pagsimba kaniya, ang mga Asiryanhon mahimong sa aktuwal nagsimba sa ilang katigulangan, si Asur, nga anak nga lalaki ni Sem. Ang ngalang Asur gikombinar sa daghang Asiryanhong mga ngalan, sama nianang kang Esar-hadon ug Ashurbanipal.

Ang mini nga diyos nga si Asur gituohan nga mao ang pangunang tigpanalipod sa mga Asiryanhon, nga gihawasan diha sa ilang mga dibuho ingong pak-an nga butang nga pormag-adlaw. Sa ngalan sa ilang diyos nga si Asur ug uban sa iyang pag-uyon (nga gipaila pinaagig paborableng mga tilimad-on) nga ang kasundalohan sa Asirya makiggubat, nga magdala sa iyang sagradong simbolo ngadto sa panggubatan. Gipahinungod sa mga hari ang ilang mga kadaogan “sa tabang ni Asur.”​—Tan-awa ang HULAGWAY, Tomo 2, p. 529; ASIRYA.