Usa ka tinagik nga naglakip sa honi ug mga pulong; usa ka balaknon nga tinagik. (Tan-awa ang MUSIKA.) Mga ikanapulo nga bahin sa tibuok Bibliya maoy awit, nga ang kinadaghanan niini mao ang Mga Salmo, Awit ni Solomon, ug Lamentaciones. Bisan tuod ang Kasulatan naghisgot sa sekular nga mga awit, sama sa mga awit sa pagtamay ug sa paghaylo, ang kadaghanan sa mga 300 ka paghisgot sa Bibliya sa mga awit nalangkit sa pagsimba kang Jehova nga Diyos. Sa panguna, ang pag-awit gilangkit sa kasadya, sama sa dihang ang tinun-ang si Santiago misulat: “Aduna bay nagmasadyaon? Paawita siya ug mga salmo [mga awit sa pagdayeg sa Diyos].” (San 5:13) Ang mga awit nga nagpadayag ug kasub-anan lagmit mas tukmang tawgon nga mga awit sa pagbangotan.​—Am 8:10; tan-awa ang AWIT SA PAGBANGOTAN.

Ang unang awit nga gitala sa Bibliya mao kadtong giawit ni Moises ug sa mga kalalakin-an sa Israel, nga gitubag usab ni Miriam ug sa mga kababayen-an, sa panahon sa ilang kaluwasan sa Pulang Dagat. (Ex 15:1-21) Ang uban pa mao ang awit sa pagpanamilit ni Moises, ang awit sa kadaogan ni Debora ug Barak, ug ang awit sa pagbangotan ni David tungod sa kamatayon ni Saul ug sa minahal nga higala ni David nga si Jonatan. (Deu 31:30; 32:1-43; Huk 5:1-31; 2Sa 1:17-27) Ang dugang nga mga tinagik ni David naglakip ug labing menos 73 ka awit diha sa Mga Salmo. Ang Bibliya naghisgot usab sa “awit kang Jehova,” nga gihisgotan maylabot sa pagpasig-uli ni Ezequias sa putli nga pagsimba, maingon man sa ‘awit ni Moises ug sa Kordero.’​—2Cr 29:27; Pin 15:​3, 4.

Ang mga paghisgot sa “usa ka bag-ong awit” makita dili lamang sa Mga Salmo kondili diha usab sa mga sinulat ni Isaias ug ni apostol Juan. (Sal 33:3; 40:3; 96:1; 98:1; 144:9; 149:1; Isa 42:10; Pin 5:9; 14:3) Ang pagsusi sa konteksto nga naglibot sa kadaghanang paggamit sa ekspresyon nga “bag-ong awit” nagpadayag nga ang maong awit giawit tungod sa usa ka bag-ong kaugmaran sa  paggamit ni Jehova sa iyang pagkasoberano sa uniberso. Ingon sa masadyaong gimantala sa Salmo 96:10: “Si Jehova nahimong hari.” Ang bag-ong mga kaugmaran sa pagpadako ni Jehova sa iyang pagkahari, ingon man ang kahulogan niini alang sa langit ug sa yuta, mopatim-awng mao ang ulohan niining “bag-ong awit.”​—Sal 96:11-13; 98:9; Isa 42:​10, 13.