[Tag-iya sa Usa ka Pakigsaad; sa Huk 9:​46, kini kausa lamang makita ingong El-berit, Diyos sa Usa ka Pakigsaad].

Ang Baal sa Sekem, nga gisimba sa mga Israelinhon human sa kamatayon ni Maghuhukom Gideon. (Huk 8:33) Ang ngalang “Baal-berit” mahimong magpasabot nga kini nga Baal gituohang magbantay sa pagtuman sa mga pakigsaad.

Dayag nga dihay usa ka tipiganan sa bahandi nga gidugtong sa balay o templo ni Baal-berit didto sa Sekem. (Huk 9:4) May kalabotan sa pag-ani sa mga ubas, ang mga Sekemnon dayag nga nagsaulog ug usa ka pista agig pasidungog kang Baal-berit, nga gitapos pinaagig usa ka matang sa pagpangaon ingong halad didto sa templo sa ilang diyos. Didto sa templo ni Baal-berit panahon sa ilang pagpangaon ug pag-inom ug pagtunglo kang Abimelek, ug lagmit ilalom sa impluwensiya sa bino, nga si Gaal nag-aghat sa mga Sekemnon sa pag-alsa batok kang Haring Abimelek. (Huk 9:27-29) Sa ulahi, sa dihang gihulga ni Abimelek, ang mga tag-iyag yuta sa torre sa Sekem (Migdal-Sekem, AT) midangop sa inarkong lawak nga tagoanan sa balay ni El-berit (Baal-berit), apan nangamatay sa dihang gisunog kini ni Abimelek ug sa iyang mga tawo.​—Huk 9:46-49.