[Tag-iya sa mga Langaw].

Ang Baal nga gisimba sa mga Filistehanon didto sa Ekron. Adunay mga timailhan nga komon nang batasan taliwala sa mga Hebreohanon ang pag-usab sa mga ngalan sa bakak nga mga diyos ngadto sa kokaamgid apan matamayon nga ngalan. Busa, ang tumoy niini nga “zebub” lagmit maoy usa ka pag-usab sa usa sa mga titulo ni Baal nga gipakita diha sa mga teksto sa Ras Shamra ingong “Zabul” (“Prinsipe”), o Zebul. Apan, ang pipila ka eskolar naghunahuna nga kining ngalana gihatag sa iyang mga magsisimba ngadto sa maong diyos tungod kay siya giisip ingong tigpatungha sa mga langaw ug busa makahimo sa pagkontrolar niining komon nga dangan sa Tungang Sidlakan. Sanglit ang paghatag ug mga orakulo gilangkit kang Baal-zebub, ang uban mipabor sa opinyon nga si Baal-zebub maoy usa ka diyos nga gikaingong naghatag ug mga orakulo pinaagi sa paglupad o paghadyong sa usa ka langaw.​—2Ha 1:2.

Si Ahazias nga hari sa Israel nagpadalag mga mensahero aron sa pagpakisayod kang Baal-zebub kon siya ba maulian sa iyang grabeng pagkaangol o dili. Pinaagi sa iyang manalagna nga si Elias, si Jehova nagbadlong kang Ahazias, nga nag-ingon: “Tungod ba kay wala gayoy Diyos sa Israel nga ikaw nagpasugo aron sa pagpakisayod kang Baal-zebub nga diyos sa Ekron? Busa, mahitungod sa higdaanan nga imong gisak-an, ikaw dili manaog gikan niini, tungod kay ikaw tinong mamatay.”​—2Ha 1:2-8; tan-awa ang BEELZEBUB.