[Heb., chazirʹ].

Kini nga hayop gihisgotan sa Kasulatan diha sa Salmo 80:​13, diin giingong kini mohimog kadaot sa dili binantayan nga kaparasan. Kini lahi sa binuhing butakal nga pamilya ra niini. Kini nga hayop (Sus scrofa) makaplagan pa gihapon diha sa kalamakan sa Palestina.

Ang usa ka dako nga baboyng ihalas tingali motimbang ug mga 160 kg (350 lb), halos 1.5 m (5 p) ang gitas-on, ug tingali may gihabogong 1 m (3 p) taman sa abaga. Ang simod sa baboyng ihalas nahiangay gayod sa pag-ungad aron sa pagpangitag pagkaon taliwala sa mga tanomtanom sa lasang. Ang mga bangkil niini, ilabina nianang sa laki, maoy usa ka lig-ong hinagiban, nga pinaagi niini dali rang makuniskunis ang usa ka kabayo. Kini nga hayop dili lamang makuyaw kondili makahimo usab ug dakong perdisyon, gikaingon nga ang usa ka grupo niini makadaot sa tibuok parasan sa usa lamang ka gabii. Ang pagkaon niini, bisan tuod kini tigkaon ug mga tanom, naglakip sa nagkadaiyang mga pagkaon sama sa mga gamot, mga lugas, wati, hilahila, gagmayng mga hayop, itlog sa langgam, ug ang susama niana.