Usa ka ekspresyon nga makaplagan sa duha ka higayon, ug diha lamang sa simboliko kaayong basahon sa Pinadayag. (Pin 3:12; 21:2) Duol sa kataposan niining sunodsunod nga mga panan-awon, ug human makita nga nalaglag ang Dakong Babilonya, si apostol Juan miingon: “Nakita ko usab ang balaang siyudad, ang Bag-ong Jerusalem, nga nanaog gikan sa langit gikan sa Diyos ug giandam ingong usa ka pangasaw-onon nga gidayandayanan alang sa iyang bana.”​—Pin 21:2.

Ang Pangasaw-onon sa Kordero. Sa kahayag sa ubang mga teksto, tinong gipaila kon unsa ang Bag-ong Jerusalem. Siya maoy ‘ingon sa usa ka pangasaw-onon.’ Dugang pa, si Juan misulat: “Ang usa sa pito ka manulonda . . . nakigsulti kanako ug miingon: ‘Umari ka, ipakita ko kanimo ang pangasaw-onon, ang asawa sa Kordero.’ Busa gidala niya ako diha sa gahom sa espiritu ngadto sa usa ka dako ug habog nga bukid, ug gipakita niya kanako ang balaang siyudad nga Jerusalem nga nanaog gikan sa langit gikan sa Diyos ug may himaya sa Diyos. Ang kasidlak niini ingon sa usa ka batong bililhon kaayo, ingon sa usa ka batong haspe nga naggilakgilak nga sama katin-aw sa kristal.”​—Pin 21:9-11.

Kang kinsang pangasaw-onon ang Bag-ong Jerusalem? Sa Kordero sa Diyos, si Jesu-Kristo, kinsa nag-ula sa iyang dugo ingong halad alang sa katawhan. (Ju 1:29; Pin 5:​6, 12; 7:14; 12:11; 21:14) Sa unsang paagi mailhan kining Bag-ong Jerusalem? Siya gilangkoban sa mga sakop sa hinimayang Kristohanong kongregasyon. Ang kongregasyon dinhi sa yuta gipakasama sa “usa ka putli nga ulay” nga ipresentar ngadto kang Kristo. (2Co 11:2) Sa makausa pa, gipakasama ni apostol Pablo ang Kristohanong kongregasyon sa usa ka asawa, nga si Kristo mao ang iyang Bana ug Ulo.​—Efe 5:23-25, 32.

Dugang pa, si Kristo namulong sa kongregasyon diha sa Pinadayag 3:​12, nga nagsaad sa matinumanong mananaog nga iyang isulat diha kaniya “ang ngalan sa akong Diyos ug ang ngalan sa siyudad sa akong Diyos, ang bag-ong Jerusalem nga manaog gikan sa langit gikan sa akong Diyos, ug ang akong bag-ong ngalan.” Ang asawa magdala sa ngalan sa iyang bana. Busa kadtong nakita nga nagbarog kauban sa Kordero diha sa Bukid sa Zion, nga 144,000 ang gidaghanon, nga nagbaton sa ngalan sa Kordero ug sa ngalan sa iyang Amahan nga gisulat diha sa ilang mga agtang, dayag nga mao ra nga grupo, ang pangasaw-onon.​—Pin 14:1.

Nganong ang “Bag-ong Jerusalem” dili usa ka siyudad sa Tungang Sidlakan?

Ang Bag-ong Jerusalem maoy langitnon, dili yutan-on, kay kini nanaog “gikan sa langit gikan sa Diyos.” (Pin 21:10) Busa dili kini usa ka siyudad nga tinukod sa mga tawo nga adunay literal nga mga  dalan ug mga bilding nga gitukod didto sa Tungang Sidlakan sa dapit nga nahimutangan sa karaang siyudad sa Jerusalem, nga gilaglag niadtong 70 K.P. Ang mga sakop sa pangasaw-onon nga matang, sa dihang dinhi sa yuta, giingnan nga ang ilang “pagkalungsoranon nagalungtad sa mga langit” ug nga ang ilang paglaom mao ang pagdawat sa “usa ka dili-madunoton ug wala-mahugawi ug dili-malawos nga panulondon.” “Gitagana kini sa mga langit alang kaninyo,” matod ni apostol Pedro.​—Flp 3:20; 1Pe 1:4.

Niadtong 537 W.K.P., gilalang ni Jehova ang “bag-ong mga langit ug usa ka bag-ong yuta” sa dihang ang nahibiling mga Hudiyo gipasig-uli ngadto sa Jerusalem gikan sa pagkadestiyero sa Babilonya. (Isa 65:17) Dayag nga ang pagkagobernador ni Zorobabel (usa ka kaliwat ni David) inabagan sa Hataas nga Saserdoteng si Josue, didto sa siyudad sa Jerusalem, mao ang “bag-ong mga langit” niadtong panahona. (Hag 1:​1, 14; tan-awa ang LANGIT [Bag-ong mga langit ug bag-ong yuta].) Ang Bag-ong Jerusalem, uban kang Kristo diha sa iyang trono niining simbolikong siyudad, mao ang “bag-ong mga langit” nga magmando ibabaw sa “bag-ong yuta,” ang tawhanong katilingban sa yuta.

Ang ebidensiya nga ang Bag-ong Jerusalem usa gayod ka langitnong siyudad dugang gipamatud-an sa panan-awon nga nakita ni Juan bahin niini. Usa ka simbolikong siyudad lamang ang may mga sukod ug kahalangdon nga sama sa Bag-ong Jerusalem. Ang patukoranan niini maoy kuwadrado, mga 555 km (345 mi) sa matag kilid, o mga 2,220 km (1,379 mi) sa tibuok palibot, nga mao, 12,000 ka estadio. Kay kuwadrado ug porma, ang siyudad may gihabogon usab nga pareho sa gitas-on ug gilapdon niini. Walay hinimog-tawo nga siyudad nga ang gihabogon nakaabot ngadto sa “kawanangan.” Sa palibot may paril nga 144 ka maniko (64 m; 210 p) ang gihabogon. Ang paril, nga ginama sa haspe, gitukod ibabaw sa 12 ka patukoranang mga bato, bililhong mga bato nga matahom kaayo​—haspe, sapiro, kalsidonya, esmeralda, sardonika, sardio, krisolito, berilo, topasyo, krisopraso, hasinto, ug amatista. Niining 12 ka patukoranang mga bato gikulit ang mga ngalan sa 12 ka apostoles sa Kordero. Ang siyudad sa sulod niining matahom nga mga paril maoy mahimayaon gayod, kay kini gihubit ingong “lunsayng bulawan nga sama sa tin-aw nga bildo,” nga may halapad nga dalan nga “lunsayng bulawan, ingon sa tin-aw nga bildo.”​—Pin 21:​12-21.

Usa ka Putli, Makahatag ug Kaayohan nga Pagmando. Ang agianan ngadto sa Bag-ong Jerusalem latas sa halangdong mga paril niini mao ang 12 ka ganghaan, tulo sa matag kilid, nga ang matag usa ginama sa dakong perlas. Bisan tuod kini nga mga ganghaan wala gayod sirad-i, “ang bisan unsa nga dili sagrado ug si bisan kinsa nga padayong nagbuhat ug dulumtanang butang ug bakak dili gayod makasulod niini; sila lamang nga nahisulat sa linukot nga basahon sa kinabuhi nga iya sa Kordero.” Kini usa gayod ka balaan ug sagradong siyudad, apan walay makitang templo alang sa pagsimba, kay “ang Labing Gamhanang Diyos nga si Jehova mao man ang templo niini, mao man usab ang Kordero.” Ug kini “wala magkinahanglan sa adlaw ni sa bulan nga modan-ag niini, kay ang himaya sa Diyos nagdan-ag niini, ug ang lampara niini mao ang Kordero.” Ang pagmando niini ibabaw sa kanasoran makahatag kanila ug kaayohan, kay “ang kanasoran managlakaw pinaagi sa kahayag niini.”​—Pin 21:22-27.