[Pinili].

Usa ka balangay sa Bukid sa mga Olibo, nga nahimutang sa A nga kiliran sa karaang dalan paingon sa Jerico ug sa Jordan. Gituohan kini sa kadaghanan nga mao ang Ras et-Tmim, 2 km (mga 1 mi) sa AS sa Patukoranan sa Templo.

Ang naghilak nga si Paltiel misunod sa paglakaw sa anak nga babaye ni Saul nga si Mikal hangtod sa Bahurim sa dihang siya gibalik kang Haring David. Ang mando ni Heneral Abner: “Lakaw, pauli!” igo na aron siya mopauli nianang higayona. (2Sa 3:16) Sa ulahi, si David, sa dihang mibiya sa Jerusalem tungod sa pakigkunsabo sa iyang anak nga lalaki nga si Absalom batok kaniya, mitabok sa bul-oganang walog sa Kidron, mitungas “sa tungasanan sa mga Olibo,” nga mitabok saylo pa sa kinatumyan, ug nahiabot sa Bahurim. (2Sa 15:​23, 30; 16:​1, 5) Dinhi si Simei, ang Benjaminhong paryente ni Saul, milakaw ubay sa kiliran sa bukid, nanghimaraot kang David, nagbato, ug nagsaliyab ug abog. (2Sa 16:5-13; 19:15-23) Ang Bahurim mao usab ang dapit diin si Ahimaaz ug Jonatan, ang mga anak nga lalaki ni Zadok ug Abiatar, kinahanglang motago sulod sa atabay sa usa ka tawo sa dihang sila miadto aron sa paghatod ug mensahe ngadto kang Haring David.​—2Sa 15:27; 17:17-20.