Usa ka luna sa yuta diha sa panan-awon ni Ezequiel maylabot sa pagbahinbahin sa Yutang Saad.

Ang matag usa sa 12 ka tribo, gawas lamang sa tribo ni Levi (ang Epraim ug Manases naghawas kang Jose, mao nga nahimong 12), gihatagan ug pahat gikan sa S ngadto sa K latas sa yuta. Dapit sa habagatan sa luna alang kang Juda, nga mao ang ikapitong pahat gikan sa amihanang tumoy, may usa ka administratibong luna sa yuta. (Eze 48:1-8) Ang amihanang utlanan niini nga luna nagbuyon sa habagatang utlanan sa pahat ni Juda; ang utlanan niini sa H mao ang bahin ni Benjamin, nga mao ang ikalimang pahat gikan sa habagatang tumoy. (Eze 48:23-28) Kini nga administratibong luna maoy 25,000 ka maniko (13 km; 8 mi) ang gilapdon gikan sa A ngadto sa H. Ang katawhan kinahanglang maghatag niini aron magamit sa kagamhanan.​—Eze 48:8.

Ang sangtuwaryo ni Jehova nahimutang taliwala sa 25,000-maniko-kuwadrado nga “amot” sulod sa administratibong luna. Ang nahibilin sa luna dapit sa S ug K niini nga “amot” gilangkoban sa duha ka bahin alang sa pangulo. (Eze 48:20-22; tan-awa ang HAMILI, PANGULO, PRINSIPE.) Ang kuwadradong luna nga “amot” gibahin ingon sa mosunod: usa ka luna nga nagbuyon sa amihanang utlanan, 10,000 ka maniko (5.2 km; 3.2 mi) ang gilapdon, alang sa dili-saserdoteng mga Levihanon. Walay usa niini nga pahat sa yuta ang ibaligya o ibaylo, “kay kini balaan nga butang alang kang Jehova.” (Eze 48:​13, 14) Sikbit sa pahat sa mga Levihanon dapit sa H mao ang 10,000-ka-maniko nga luna, usa ka “balaang amot alang sa mga saserdote.” Nahimutang niini nga bahin sa mga saserdote ang sangtuwaryo o templo ni Jehova. (Eze 48:9-12) Kini nagbilin ug usa ka luna nga 5,000 ka maniko (2.6 km; 1.6 mi) ang gilapdon dapit sa habagatan. Kini nga bahin maoy “butang nga dili balaan alang sa siyudad, alang sa puloy-anang dapit ug alang sa sibsibanan.” (Eze 48:15) Sa taliwala niini nga bahin nahimutang ang siyudad nga gitawag ug “Si Jehova Anaa Diha.” Ang siyudad maoy 4,500 ka maniko (2.3 km; 1.4 mi) kuwadrado, nga may 12 ka ganghaan, may usa ka sibsibanan nga 250 ka maniko (130 m; 425 p) ang gilapdon sa palibot niini. Ang nahibiling bahin sa 25,000 ka maniko kuwadrado,  nga mao ang 10,000 ka maniko sa S sa siyudad ug 10,000 ka maniko sa K (5,000 ka maniko ang gilapdon), giisip usab nga dili balaan ug gitikad sa mga tribo sa Israel aron makataganag pagkaon alang sa siyudad.​—Eze 48:15-19, 30-35.

Busa, ang “balaang amot” maoy 25,000 ka maniko sa S ngadto sa K ug 20,000 ka maniko sa A ngadto sa H. Gilangkoban kini sa duha ka luna nga tag-10,000 ka maniko ang gilapdon, ang usa gipahat ngadto sa mga saserdote ug ang lain ngadto sa mga Levihanon. Ang nahibilin sa 25,000 ka maniko kuwadrado nga amot maoy “butang nga dili balaan,” nga gigamit “alang sa siyudad, alang sa puloy-anang dapit ug alang sa sibsibanan.”​—Eze 48:​10, 13-15, 18, 20, 21.