Ang pulong nga panagkatigom diha sa terminong “balaang panagkatigom” mao ang hubad sa Hebreohanong pulong nga miq·raʼʹ, nga nagkahulogang “usa ka panawagan alang sa panagkatigom,” o “panagtapok.” Ang laing hubad niini nga Hebreohanong pulong mao ang “panagtipon.” Ang Numeros 10:2 nagpakita sa pangunang kahulogan niini sa dihang gigamit kini aron ipasabot ang pagtigom sa katawhan sa Israel.​—Itandi ang Isa 1:​13, ftn sa Rbi8.

Ang “balaang mga panagkatigom” gieskedyul ingon sa mosunod: (1) Matag Igpapahulay (Lev 23:3); (2) ang una ug ang ikapitong adlaw sa Pista sa mga Tinapay nga Walay Igpapatubo panahon sa Nisan, ang unang bulan (Marso-Abril) (Num 28:​18, 25; Lev 23:6-8); (3) ang Pista sa mga Semana o Pista sa Pagpangani, sa ulahi nailhan ingong Pentekostes, nga gisaulog sa ikatulong bulan, sa Sivan (Mayo-Hunyo) (Lev 23:15-21); (4) ang una ug ang ikanapulong adlaw sa ikapitong bulan, sa Etanim o Tisri (Septiyembre-Oktubre), nga ang ikanapulong adlaw mao ang Adlaw sa Pagtabon-sa-Sala (Lev 23:23-27; Num 29:​1, 7); (5) ang unang adlaw sa Pista sa mga Balongbalong, nga magsugod sa ika-15 nga adlaw sa ikapitong bulan, sa Etanim o Tisri, usab ang adlaw human nianang pito-ka-adlaw nga pista.​—Lev 23:33-36.

 Ang usa ka talagsaong bahin niining tanan nga “balaang mga panagkatigom” mao nga sa panahon sa pagsaulog niini walay mahagong buluhaton nga himoon sa katawhan. Pananglitan, ang una ug ang ikapitong adlaw sa Pista sa mga Tinapay nga Walay Igpapatubo maoy “balaang mga panagkatigom,” nga labot niini si Jehova miingon: “Walay trabaho nga buhaton nianang mga adlawa. Ang gikinahanglan lamang nga kan-on sa matag kalag, kana lamang ang mahimo ninyong buhaton.” (Ex 12:​15, 16) Apan, panahon sa “balaang mga panagkatigom” ang mga saserdote puliki sa pagtanyag ug mga halad ngadto kang Jehova (Lev 23:​37, 38), nga tinong dili paglapas sa bisan unsang sugo batok sa paghimo sa naandang buluhaton sa adlaw-adlaw. Kini nga mga okasyon dili usab yugto diin walay buhat ang katawhan sa katibuk-an kondili maoy mga panahon sa dakong espirituwal nga kaayohan. Sa senemanang adlaw nga Igpapahulay, ang katawhan magtigom alang sa publikong pagsimba ug instruksiyon. Dayon sila mapalig-on pinaagi sa publikong pagbasa ug pagpatin-aw sa sinulat nga Pulong sa Diyos, sama sa gihimo diha sa ulahing mga sinagoga. (Buh 15:21) Busa, sanglit ang katawhan walay himoong mahago nga buluhaton panahon sa adlaw nga Igpapahulay o sa uban nga “balaang mga panagkatigom,” ilang ideboto ang ilang kaugalingon diha sa pag-ampo ug pagpamalandong bahin sa Maglalalang ug sa iyang mga katuyoan.​—Tan-awa ang KATIGOMAN, PANAGKATIGOM.