[Iyang Gihimong Awaaw].

Usa ka hari sa Moab nga magsisimba ni Baal niadtong ika-15 nga siglo W.K.P.; anak nga lalaki ni Zipor. Ang katawhan ni Balak nahadlok pag-ayo ug mibatig “hilabihang kalisang” sa dihang ilang nakita ang gibuhat sa Israel ngadto sa mga Amorihanon. Kay nakigkunsabo sa Midian, gipasugoan ni Balak si Balaam didto sa lungsod sa Petor duol sa Suba sa Euprates nga moadto kaniya gikan sa Mesopotamia ug tunglohon ang Israel pinaagig “mahikanhong gahom,” sa paglaom nga pinaagi niana sila makabentaha sa militaryong paagi. (Num 23:21) “Tan-awa!” si Balak miingon kang Balaam, “milukop [ang mga Israelinhon] sa yuta kutob sa maabot sa panan-aw, ug sila mismo nagpuyo sa akong atubangan.” Sa sinugdan midumili si Balaam sa pagkuyog, apan human magpadala si Balak ug mas dungganon nga delegasyon sa mga prinsipe ug gipadak-an ang iyang tanyag, ang hakog nga manalagna sa kataposan misugot, nga may pagtugot ni Jehova. Pag-abot sa tampi sa Arnon, gikasab-an siya ni Balak: “Nganong wala ka man moanhi kanako [sa unang higayon]? Dili ba gayod ako makahimo sa pagpasidungog kanimo?”​—Num 22:2-37.

Gidala ni Balak si Balaam sa tulo ka bantaaw nga dapit aron malantaw ang panon sa Israel. Sa matag dapit gihimo ang parehong paagi sa paghalad; si Balak gisugo nga maghimog pito ka halaran nga ibabaw niana igahalad ang pito ka torong baka ug pito ka laking karnero. Hinunoa, sa matag dapit, imbes nga tunglohon ang Israel, si Balaam nagpanalangin kanila.​—Num 22:41–​24:9; Miq 6:5.

Tungod niini, “ang kasuko ni Balak misilaob batok kang Balaam.” Mipakpak sa iyang mga kamot tungod sa kasuko, siya mipatugbaw: “Gitawag ko ikaw aron sa pagpanghimaraot sa akong mga kaaway, ug, tan-awa! sila imong gipanalanginan sa hilabihan niining tulo ka higayon. Ug karon kalagiw sa imong dapit.” Apan sa wala pa mobiya kining manalagna nga taga-Petor, iyang gitagna ang Mesiyanikong “bituon” nga magagikan sa binhi ni Jacob.​—Num 24:10-17; Jos 24:​9, 10; Huk 11:25.

Ang misunod nga mga panghitabo nagpakita nga si Balaam usab “nagtudlo kang Balak sa pagbutang ug kapandolan atubangan sa mga anak sa Israel, sa pagkaon sa mga butang nga gihalad ngadto sa mga idolo ug sa pagpakighilawas.”​—Pin 2:14; Num 25:1-18.