Usa ka samag-atop nga silonganan nga hinimo sa mga sanga ug mga dahon sa kahoy, usahay may salog nga kahoy nga gipakawan gikan sa yuta; sa Hebreohanon, suk·kahʹ (sokh diha sa Lam 2:6), ug sa Grego, ske·neʹ. (Buh 15:16) Sa panahon sa tinuig nga Pista sa mga Balongbalong didto sa Jerusalem, ang mga balongbalong gitukod diha sa mga atop sa mga balay, sa mga sawang, sa mga plasa, bisan sa mga nataran sa templo, ug sa daplin sa mga dalan duol sa Jerusalem. Ang mga sanga sa mga kahoyng alamo, olibo, ug oleifero ingon man usab ang mga dahon sa palma ug ang humot nga mirto gigamit sa pagtukod niini. Kini maoy aron pahinumdoman ang Israel nga sila gipapuyo ni Jehova sa mga balongbalong sa dihang sila iyang gipagula gikan sa Ehipto.​—Lev 23:​34, 40-43; Neh 8:15; tan-awa ang PISTA SA MGA BALONGBALONG.

 Ang mga balongbalong gigamit usab alang sa daghang praktikal nga mga katuyoan. Si Jacob naghimog mga balongbalong aron kasilongan sa iyang panon sa kahayopan, ug kadtong dapita iyang ginganlan ug Sucot, nga nagkahulogang “Mga Balongbalong.” (Gen 33:17) Ang mga balongbalong gigamit sa mga sundalo diha sa kapatagan, ilabina sa mga opisyal.​—1Ha 20:​12, 16.

Ang usa ka balongbalong, o payag, sagad nga gitukod diha sa parasan o sa usa ka umahan aron ang tigbantay adunay kasilongan gikan sa init nga adlaw samtang siya nagbantay batok sa mga kawatan o kahayopan. (Isa 1:8) Ilalom sa landong niana ang mga mangangani mokaon sa ilang paniudto ug sa ingon walay mausik nga panahon kon mobiya pa sa uma. Ang balongbalong nga inatopan sa bagang pinawod nga mga dahon nagsilbing silonganan gikan sa ulan. (Isa 4:6) Si Jonas naghimo ug ingon niini nga balongbalong aron iyang kasilongan gikan sa init sa adlaw samtang siya naghulat kon unsay mahitabo sa Nineve, nga batok niana siya nanagna.​—Jon 4:5.

Mahulagwayong mga Paggamit. Gihulagway ni Isaias ang pagkabiniyaan sa Jerusalem diha sa panan-aw ni Jehova, nga nagpakasama niini sa usa ka balongbalong sa parasan, nga lahi sa daghag pumoluyo, malig-on nga siyudad. (Isa 1:8) Gihulagway ni Jehova ang iyang kaugalingon ingong nagpuyo sa usa ka balongbalong nga panganod sa dihang siya temporaryong nanaog gikan sa langit nganhi sa yuta. Dinha nagtago ang halangdon nga labing gamhanan, ug dinha niana naggikan ang mga dinaguok sa dalugdog. (Sal 18:​9, 11; 2Sa 22:​10, 12; Job 36:29) Gipakasama ni David sa “balongbalong” ni Jehova ang dapit nga tagoanan niadtong nagasalig kang Jehova.​—Sal 31:20.

Gihisgotan ni Amos ang pagtukod pag-usab sa “napukan nga balongbalong ni David.” (Am 9:11) Gisaaran ni Jehova si David nga ang gingharian ni David mahimong lig-on hangtod sa panahong walay tino. Mahitungod sa pagkapukan sa gingharian sa Juda ug sa kataposang hari niini nga si Zedekias sa linya ni David, si Ezequiel giinspirar sa pagtagna: “Kagun-oban, kagun-oban, pagahimoon ko kini nga kagun-oban. Ug kon bahin niini usab, walay magapanag-iya niini hangtod nga moabot siya nga may legal nga katungod, ug ihatag ko kini kaniya.” (Eze 21:27) Sukad sa maong panahon walay hari sa linya ni David nga milingkod sa “trono ni Jehova” sa Jerusalem. (1Cr 29:23) Apan si Pedro sa adlaw sa Pentekostes, 33 K.P., nagpunting nga si Jesu-Kristo maoy gikan sa linya ni David ug mao gayod ang gihisgotan sa Diyos ingong permanenteng Hari. Gipahibalo ni Pedro ang mga Hudiyo nga nagkatigom didto sa Jerusalem nga, sa ilang panahon, gibanhaw ni Jehova si Jesus ug gihimong Ginoo ug Kristo. (Buh 2:29-36) Sa ulahi, ang tinun-an nga si Santiago naghisgot nga ang tagna ni Amos nakabaton ug katumanan sa dihang gitigom ang mga tinun-an ni Kristo (mga manununod sa Gingharian) gikan sa mga Hudiyo ug sa Hentil nga mga nasod.​—Buh 15:14-18; Rom 8:17.