[Hatag-as nga mga Dapit ni Baal].

Usa ka lungsod sa Moab diin si Balak nga hari sa Moab nagdala kang manalagnang Balaam aron iyang makita ang kampo sa Israel ug tunglohon kini. (Num 22:41) Ang pagpili ni Balak niining dapita aron himoon ang pagtunglo ug ang mga paghalad lagmit nagpakita nga kini maoy sentro sa pagsimba kang Baal, nga tatawng nahimutang sa usa ka habog nga dapit. (Num 23:1-9) Human niadto, ang Bamot-baal ug ang ubang mga lungsod “nga anaa sa patag sa bukid” gipahat ngadto sa tribo ni Ruben ingong panulondon. (Jos 13:​15, 17) Sa sayong bahin sa ikasiyam nga siglo W.K.P., si Haring Mesa sa Moab nag-ingon nga iyang gitukod pag-usab ang “Bet-bamot, kay kini nalaglag.” (Linya 27 sa Bato sa Moab) Lagmit nga ang Bamot, Bamot-baal, ug Bet-bamot maoy mga ngalan sa mao ra nga lugar.​—Itandi ang Baal-meon, Beon, Bet-baal-meon sa artikulo nga BAAL-MEON.

Ang paghulagway nga gihatag sa asoy sa Bibliya nagpakita nga kini maoy usa ka dapit diha sa rehiyon sa kapatagan sa bukid dapit sa AS nga kiliran sa Patayng Dagat. Bisan tuod dili tino ang nahimutangan niini, gituohan nga mao kini ang Khirbet Quweijiya, mga 14 km (9 mi) sa S sa Patayng Dagat, duol sa posibleng nahimutangan sa Bukid sa Nebo.