Usa ka dapit nga sagad gitukod ibabaw sa paril sa siyudad diin didto magbantay o maniid ang usa ka guwardiya. (Tan-awa ang TORRE.) Ang ubang mga bantayanang torre gitukod diha sa mga dapit sa kamingawan o sa mga utlanan. Kini pangunang gihimo alang sa militaryong mga katuyoan ug sa pagpanalipod sa usa ka siyudad o sa usa ka utlanan; kini gitukod usab ingong mga dapit nga dalangpanan sa mga magbalantay sa kahayopan ug sa mga mag-uuma sa hilit nga mga dapit ug pinaagi niini ang usa ka tigbantay makapasidaan kon may nagsingabot nga mga tulisan aron ang panon sa kahayopan ug ang nagkahinog nga mga abot sa maong dapit mapanalipdan.​—2Cr 20:24; Isa 21:8; 32:14.

Ubay-ubayng mga siyudad ang ginganlan ug Mizpe (Heb., mits·pehʹ, “Bantayanang Torre”), lagmit tungod kay kini nahimutang sa habog nga mga dapit o tungod sa iladong mga torre nga gitukod didto. Usahay gipalahi sa Bibliya kini nga mga siyudad pinaagi sa paghisgot sa lokasyon niini, sama sa “Mizpe sa Gilead” (Huk 11:29) ug “Mizpe sa Moab.”​—1Sa 22:3.

Ang usa ka tapok sa mga bato gipatindog ni Jacob ug gitawag nga “Galeed” (nagkahulogang “Tapok nga Saksi”) ug “Ang Bantayanang Torre.” Dayon si Laban miingon: “Hinaot si Jehova magbantay tali kanako ug kanimo sa dihang kita mahimutang nga dili magkitaay sa usag usa.” (Gen 31:45-49) Kini nga tapok sa mga bato magpamatuod nga si Jehova nagbantay aron matino nga si Jacob ug si Laban magatuman sa ilang pakigsaad sa pakigdait.