[Anak ni Jesus].

Usa ka Hudiyo sa Pafos sa pulo sa Cipro niadtong unang siglo K.P., kinsa “usa ka barangan, usa ka mini nga manalagna.” (Buh 13:6) Iyang giangkon ang propesyonal nga ngalan o titulo nga Elimas, nga nagkahulogang “Barangan.”​—Tan-awa ang ELIMAS.

Mopatim-aw nga si Bar-Jesus naghupot ug impluwensiyadong posisyon ingong salamangkero sa palasyo ug magtatambag ni Sergio Paulo, ang Romanong prokonsul sa Pafos. Ingong usa ka “saserdote” sa kulto sa pagpanag-an, si Bar-Jesus batok gayod sa Kristiyanidad, ug kay buot nga protektahan ang iyang dakog-kita nga posisyon, bug-os ang iyang pagsupak sa pagsangyaw ni Pablo ug Bernabe. Busa, sa dihang si Sergio Paulo “matinuorong nagtinguha nga makadungog sa pulong sa Diyos,” si Elimas “misupak kanila, nga nagtinguha sa pagpahilayo sa prokonsul gikan sa pagtuo.”​—Buh 13:​7, 8.

Tungod niana, gitutokan ni Pablo kining Satanikong barangan ug, “napuno sa balaang espiritu,” siya miingon: “Oh tawo nga puno sa tanang matang sa panikas ug sa tanang matang sa pagkalampingasan, ikaw nga anak sa Yawa, ikaw nga kaaway sa tanang butang nga matarong, dili ka ba mohunong sa pagtuis sa matul-id nga mga dalan ni Jehova? Nan, karon, tan-awa! ang kamot ni Jehova maoy batok kanimo, ug ikaw mabuta, nga dili makakita sa kahayag sa adlaw sulod sa usa ka yugto sa panahon.” Dihadiha si Bar-Jesus nabuta. Sa dihang nasaksihan kining unang natala nga milagro ni Pablo, ang prokonsul “nahingangha sa pagtulon-an ni Jehova,” ug dihadiha iyang gidawat ang mensahe ug “nahimong usa ka magtutuo.”​—Buh 13:9-12.