[Si Jehova Nagpanalangin].

Amahan ni Zacarias kinsa gibuno “taliwala sa sangtuwaryo ug sa halaran.”​—Mat 23:35; Luc 11:​50, 51.

Mahitungod sa mga pulong nga “anak ni Baraquias,” dili kini makita diha sa asoy ni Lucas, ug wala kini ilakip sa asoy ni Mateo diha sa Codex Sinaiticus (orihinal nga sinulat). Gituohan nga si Jehoiada nga amahan sa usa ka Zacarias nga gibuno, tingali dunay duha ka ngalan, sama sa ubang mga tawo diha sa Bibliya.​—Itandi ang Mat 9:9 ug Mar 2:14; Mat 10:​2, 3.

Gisabot sa kadaghanan nga si Jesus dinhi naghisgot kang Zacarias “nga anak nga lalaki ni Jehoiada nga saserdote.” (2Cr 24:20-22) Kini mao ang labing makataronganong paghinapos, sanglit ang Mga Cronicas gitala nga kataposan sa kanon sa tradisyon sa mga Hudiyo, busa naghimo kang Abel nga una ug kang Zacarias nga ulahi nga tawong matarong nga gibuno nga girekord diha sa Hebreohanong Kasulatan. Sumala sa 2 Cronicas 24:​21, si Zacarias gibuno “didto sa sawang sa balay ni Jehova.” Ang halaran sa halad-nga-sinunog maoy didto sa sulod nga sawang, sa gawas ug atubangan sa ganghaan sa sangtuwaryo. Kini mohaom sa gihisgotan ni Jesus nga dapit nga nahitaboan “taliwala sa sangtuwaryo ug sa halaran.”

Mahitungod kang Abel ug Zacarias, gitagna ang usa ka panudya tungod sa pag-ula sa ilang dugo. (Gen 4:10; 2Cr 24:22) Dugang pa, dunay dakong kaamgiran tali sa mga sirkumstansiya ug mga panghitabo sa mga adlaw ni Zacarias nga anak nga lalaki ni Jehoiada ug niadtong sa kaliwatan nga nabuhi sa dihang gihisgotan ni Jesus kining mga pulonga. Samtang si Zacarias himalatyon siya miingon: “Si Jehova magatan-aw unta niini ug magasingil niini.” Wala madugay ang iyang matagnaong mga pulong natuman. Usa ka gamayng panon sa kasundalohan sa Sirya misulong, ug gitugyan ni Jehova ang dakong kasundalohan sa Juda ngadto sa ilang kamot, nga tungod niana gilaglag ug giagawan sa hilabihan ang mga prinsipe sa Juda. Gipahamtang sa mga Siryanhon ang mga buhat sa paghukom kang Jehoas ug gibiyaan siya nga may daghang balatian, nga human niana siya gibuno sa iyang mga alagad. (2Cr 24:23-25) Human hubita ang pagkasad-an sa dugo niadtong iyang gikasulti, si Jesus miingon: “Kining tanang butanga modangat niining kaliwatana.” (Mat 23:36) Ang tagna ni Jesus natuman sa Jerusalem ug Juda niadtong 70-73 K.P.