[Anak nga Lalaki ni Timeo (Pinasidunggan)].

Usa ka buta nga makililimos kansang panan-aw gipasig-uli ni Jesus. Si Bartimeo ug ang usa ka wala hiilhing kauban naglingkod sa gawas sa Jerico sa dihang si Jesus ug ang usa ka panon milabay. Si Bartimeo nagpakisayod kon unsay hinungdan sa kaguliyang, ug sa dihang gisultihan, siya misugod sa pagsinggit: “Anak ni David, Jesus, kaluy-i ako!” Ang uban nagbadlong kaniya sa paghilom, apan misamot pa hinuon siya sa pagsinggit. Sa dihang gitawag ni Jesus, iyang gisalibay ang iyang panggawas nga besti, midali pag-adto sa Agalon, ug nagpakiluoy nga ipasig-uli ang iyang panan-aw. Si Jesus, kay nakita ang pagtuo niini nga tawo ug natukmod sa kaluoy, nag-ayo kang Bartimeo, kinsa misunod dayon kaniya ug naghimaya sa Diyos.​—Mar 10:46-52; Mat 20:29-34; Luc 18:35-43.

Sa pagtaho bahin niini, si Marcos ug Mateo nag-ingon nga kini nahitabo sa dihang si Jesus ‘migawas sa Jerico,’ apan si Lucas nag-ingon nga “samtang nagkaduol na [si Jesus] sa Jerico.” (Mat 20:29; Mar 10:46; Luc 18:35) Ang pipila nag-ingon nga nagtumong kini sa duha ka magkalahi nga mga panghitabo. Mahitungod niini, si Joseph P. Free misulat: “Hinunoa, ang arkeolohiya naghatag ug dugang katin-awan bahin niining daw panagsumpaki. Sayo sa ikakawhaan nga siglo A.D., gihimo ang mga pagpangubkob sa Jerico ni Ernest Sellin sa German Oriental Society (1907-1909). Ang mga pagpangubkob nagbutyag nga ang Jerico sa panahon ni Jesus maoy duha ka siyudad . . . Ang karaang Hudiyohanong siyudad maoy mga usa ka milya ang gilay-on gikan sa Romanhong siyudad. Tungod niini nga ebidensiya, lagmit si Mateo naghisgot sa Hudiyohanong siyudad diin nakabiya na si Kristo, samtang si Lucas naghisgot sa Romanhong siyudad diin wala pa makaabot si Kristo. Busa, sa Iyang pagpaingon gikan sa karaang siyudad ngadto sa bag-ong siyudad, nahibalag ug giayo ni Kristo ang buta nga si Bartimeo.”​—Archaeology and Bible History, 1964, p. 295.