[Anak nga Babaye sa Daghan].

Diha sa Awit ni Solomon, ang mga mata sa dalagang Sulamita gipakasama sa “mga linaw sa Hesbon, sa daplin sa ganghaan sa Bat-rabim.” (Aw 7:4) Ang Hesbon maoy usa ka siyudad sa teritoryo sa Gad apan gihatag ngadto sa mga Levihanon. (Jos 21:​38, 39) Samtang ang pipila nagtuo nga ang ngalang Bat-rabim maoy ngalan sa usa ka ganghaan sa Hesbon nga nag-atubang sa siyudad sa Raba (modernong ʽAmman) sa AS, ang uban naghunahuna nga ang Bat-rabim (nagkahulogang “Anak nga Babaye sa Daghan”) gigamit nga mahulagwayon sa pagtumong sa daghag molupyo nga siyudad sa Hesbon, ug nga ang ganghaan gitawag sa ingon sanglit daghang tawo ang moagi pasulod ug pagawas sa siyudad o magtigom diha sa ganghaan. Sa palibot sa presenteng mga kagun-oban sa siyudad, may ebidensiyang nagpakita nga kaniadto dihay karaang mga linaw ug usa ka dakong pondohanan ug tubig. Ang balaknong kahubitan naghatag ug tukmang larawan sa yano, ligdong nga katahom nga makita diha sa magilakong mga mata sa Sulamita, ang iyang agtang lagmit naghawas sa ganghaan sa siyudad.