[Mga Anak nga Lalaki ni Jaakan].

Usa ka dapit nga gihunongan sa mga Israelinhon sa ilang pagpanaw latas sa kamingawan. (Num 33:​31, 32) Si Jaakan mopatim-awng mao si Akan sa Genesis 36:27 ug 1 Cronicas 1:42 (diin sa Masoretikong teksto mabasa nga “Jaakan”). Ang asoy sa basahon sa Numeros nag-ingon nga ang mga Israelinhon “mibiya sa Moserot ug nagkampo sa Bene-jaakan. Human niana sila mibiya sa Bene-jaakan ug nagkampo sa Hor-hagidgad.”

Sa Deuteronomio 10:6 gihisgotan ang Beerot Bene-jaakan maylabot sa “Mosera” (singular sa Moserot), lagmit nagpakita nga ang Beerot Bene-jaakan (nagkahulogang “Mga Atabay sa mga Anak nga Lalaki ni Jaakan”) mao ra usab ang Bene-jaakan. Apan, baliktad ang gihisgotan sa asoy sa Deuteronomio bahin sa direksiyon sa pagpanaw sa Israel kon itandi sa asoy sa Numeros, kay ang Deuteronomio nag-ingong “ang mga anak sa Israel migikan sa Beerot Bene-jaakan paingon sa Mosera.” Tungod sa daghang katuigan nga gigugol diha sa kamingawan, posible gayod nga ang mga Israelinhon kaduha moagi niini nga rehiyon. Sama sa giingon sa The Pentateuch and Haftorahs bahin niini nga teksto: “Ang posibleng pagpatin-aw mao nga ang mga Israelinhon, human mopanaw sa habagatang direksiyon paingon sa yuta sa Edom, kinahanglang mobalik paingon sa amihanan.” (Giedit ni J. Hertz, London, 1972) Lagmit sila mibalik pag-usab nga duol ra sa ilang unang giagian ug mihapit pag-usab sa pipila ka dapit nga ilang naagian na, niining higayona sa pabalik nga direksiyon. Mamatikdan nga ang rekord sa Deuteronomio (10:6) naghisgot sa kamatayon ni Aaron human gilayon sa paghisgot sa paghunong didto sa Mosera, samtang ang asoy sa Numeros (33:31-39) naghubit sa pagpanaw sa mga Israelinhon paingon sa Ezion-geber ug dayon sa AK paingon sa Kades una pa maghisgot sa kamatayon ni Aaron. Kini, uban ang hataas nga yugto sa katuigan nga nalangkit, magtugot gayod nga makabalik sila sa ilang giagian, kon kana mao ang kahimtang.

Ang Bene-jaakan (Beerot Bene-jaakan) sagad gituohan nga mao ang usa ka dapit nga pipila ka milya sa A sa Kades-barnea.​—Tan-awa ang BEEROT  BENE-JAAKAN.