Usa ka daghag molupyo nga siyudad sa lalawigan sa Macedonia nga giduaw ni apostol Pablo panahon sa iyang ikaduhang misyonaryong panaw. (Buh 17:10-14) Kini gitawag sa pagkakaron ug Veroia ug nahimutang kanhi sa usa ka tabunok nga dapit sa tiilan sa Bukid sa Bermios nga mga 65 km (40 mi) sa KHK sa Tesalonica. Busa kini nahimutang nga mga 35 km (22 mi) pailaya gikan sa Dagat Aegean.

Lagmit niadtong mga 50 K.P. nga si Pablo ug Silas miabot sa Berea human mobiya panahon sa kagabhion gikan sa Tesalonica tungod sa kapintasan sa maguboton nga panon. Ang Berea adunay usa ka komunidad sa mga Hudiyo ug usa ka sinagoga diin didto misangyaw kining duha ka misyonaryo. Tungod sa pagkaandam sa mga taga-Berea sa pagpatalinghog sa mensahe ni Pablo ug Silas, ug tungod sa ilang kakugi sa pagsusi sa Kasulatan aron sutaon ang mga butang nga nakat-onan, sila gidayeg ingon sa makaplagan sa Buhat 17:11. Ingong resulta, daghan ang nahimong mga kinabig taliwala niining “hamilig-hunahuna” nga mga tawo, mga Hudiyo ug mga Grego. Apan, nahunong ang buluhaton ni Pablo sa dihang miabot ang panatikong mga Hudiyo gikan sa Tesalonica nga desididong magpahinabo ug dugang kasamok pinaagi sa panon sa mga manggugubot. Siya milawig ngadto sa Atenas, nga nagbiya kang Silas ug Timoteo aron sa pag-atiman sa bag-ong pundok sa mga magtutuo didto sa Berea.​—Buh 17:12-15.

Sa walay duhaduha si Pablo milatas o milabay duol sa Berea sa iyang ikatulong misyonaryong panaw, nga tungod niini siya nakaabot pag-usab sa Macedonia. Usa sa iyang mga kauban niadtong panahona mao si Sopater, usa ka Kristohanon nga taga-Berea.​—Buh 20:1-4.