[Anak sa Paghupay].

Kining prominente nga tawo sa unang-siglo nga Kristiyanidad unang gipailaila kanato ni Lucas diha sa Kasulatan sa Buhat 4:34-36. Dinhi atong masayran nga kining debotado nga tawo maoy usa ka Levihanon ug lumad sa pulo sa Cipro, apan sa panahon nga siya gipailaila, siya didto sa Jerusalem. Kining tawhana maoy usa sa mga ginganlan nga lakip sa daghang magtutuo kinsa wala madugay human sa Pentekostes nagbaligya sa ilang mga yuta ug mga balay ug naghatag sa halin niini ngadto sa mga apostoles alang sa pagpauswag sa Kristohanong buluhaton. Ang iyang tinuod nga ngalan maoy Jose, apan ang mga apostoles nag-angga kaniya ug Bernabe, nga  nagkahulogang “Anak sa Paghupay.” Kining batasan sa paghatag ug mga angga pinasukad sa mga kinaiya sa usa ka tawo maoy kasagaran.

Siya mabination ug manggihatagon kaayo nga tawo, nga sa kinabubut-on wala magpanuko sa pagtanyag sa iyang kaugalingon ug sa iyang materyal nga mga kabtangan alang sa pagpauswag sa mga intereses sa Gingharian. Siya malipayong ‘nagtabang’ sa iyang mga igsoon (Buh 9:27), ug sa atubangan sa bag-ong interesado nga mga tawo “siya nagmaya ug nagdasig kanilang tanan sa pagpadayon diha sa Ginoo uban ang kinasingkasing nga katuyoan.” Si Bernabe maoy “usa ka maayong tawo ug puno sa balaang espiritu ug sa pagtuo” (Buh 11:​23, 24), usa ka manalagna ug magtutudlo sa Antioquia. (Buh 13:1) Ang mga apostoles naghisgot kang Bernabe ingong lakip sa ilang “mga hinigugma” kinsa “mitugyan sa ilang mga kalag tungod sa ngalan sa atong Ginoong Jesu-Kristo.” (Buh 15:​25, 26) Bisan tuod siya dili usa sa 12 ka apostoles, tukmang gitawag siya nga usa ka apostol (Buh 14:14), kay, sa pagkatinuod, usa siya nga “gipadala sa balaang espiritu.”​—Buh 13:​4, 43.

Ang suod nga pagpakig-uban ni Bernabe kang Pablo, nga milungtad sa daghang katuigan, nagsugod mga tulo ka tuig human sa pagkakabig ni Pablo sa dihang buot ni Pablo nga makigkita sa kongregasyon sa Jerusalem. Wala ibutyag kon sa unsang paagi unang nahimamat ni Bernabe si Pablo. Apan si Bernabe ang nakapribilehiyo sa pagpailaila kang Pablo ngadto kang Pedro ug sa tinun-an nga si Santiago.​—Buh 9:​26, 27; Gal 1:​18, 19.

Sa kasamtangan napukaw sa pipila ka nagsultig-Gregong mga Hudiyo nga gikan sa Cipro ug Cirene ang dako kaayong interes sa Kristiyanidad didto sa Antioquia sa Sirya. Ingong resulta, ang nagamandong lawas sa Jerusalem nagpadala kang Bernabe ngadto sa Antioquia aron sa pagdasig ug pagpalig-on pa niining mga bag-ong magtutuo. Maayo ang pagkapili kang Bernabe alang niining buluhatona, sanglit siya maoy usa ka nagsultig-Grego nga taga-Cipro. Sa dihang “dakodakong panon sa katawhan ang nadugang ngadto sa Ginoo” didto sa Antioquia, si Bernabe nagdali pag-adto sa Tarso ug nagkombinsir kang Pablo nga moadto ug motabang sa ministeryo. Nianang mga panahona usab, tungod sa pasidaan sa Diyos maylabot sa umaabot nga gutom, ang mga igsoon sa Antioquia nagtigom ug daghang pagkaon ug sa takdang panahon gipadala kini ngadto sa kongregasyon sa Jerusalem pinaagi kang Bernabe ug Pablo.​—Buh 11:22-24, 27-30; 12:25.

Sa dihang natapos na kining buluhaton sa pagpadala ug hinabang, ang duha mibalik sa Antioquia sa mga 47 K.P. ug gikan didto mibiya alang sa usa ka misyonaryong asaynment ubos sa pagtultol sa balaang espiritu. Kini nagdala kang Bernabe ug Pablo una ngadto sa Cipro, diin sila nakatabang sa pagdala sa kamatuoran sa Diyos ngadto sa prokonsul nga si Sergio Paulo. Gikan didto sila mipanaw latas sa interyor nga bahin sa Asia Minor. Usahay sila lutoson pag-ayo sa magubtanong mga panon. Kas-a, sa dihang ilang giayo ang usa ka tawong bakol didto sa Listra, bag-o pa lang nilang napugngan ang “mga panon sa katawhan sa paghalad ngadto kanila” (nga nagtuong si Bernabe mao ang diyos nga si Zeus ug si Pablo, “ang nanguna sa pagsulti,” mao si Hermes, o Mercury), sa dihang ang mga Hudiyo “nangombinsir sa mga panon sa katawhan, ug ilang gibato si Pablo ug giguyod siya gawas sa siyudad.”​—Buh 13:1-12; 14:1-20.

Sa mga 49 K.P., gidala ni Bernabe ug Pablo ang mainit nga isyu bahin sa pagtuli sa mga dili Hudiyo ngadto sa nagamandong lawas sa Jerusalem, ug sa dihang nahusay na kini, mibalik dayon sila sa Antioquia nga nangandam alang sa ilang sunod nga misyonaryong panaw. (Buh 15:2-36) Apan, tungod kay wala sila magkasinabot bahin sa pagpauban kang Juan Marcos, sila nagbulag paingon sa magkalahi nga mga teritoryo. Si Bernabe nagdala sa iyang ig-agaw nga si Marcos ngadto sa Cipro, ug si Pablo nagdala kang Silas latas sa mga distrito sa Sirya ug Cilicia. (Buh 15:37-41) Dinhi natapos ang rekord bahin kang Bernabe diha sa Kasulatan, gawas sa daklit nga paghisgot kaniya diha sa pipila ka sulat ni Pablo.​—1Co 9:6; Gal 2:​1, 9, 13; Col 4:10.