[Balay sa Parasan].

Usa ka dapit duol sa Jerusalem nga gihisgotan ni Jeremias diin maayong iisa ang usa ka kalayo nga timaan aron sa pagpasidaan labot sa nagsingabot nga kaawayng kasundalohan gikan sa A. (Jer 6:1) Sa mga panahon human sa pagkadestiyero, usa ka distrito sa Juda ang nagbaton niining ngalana diin si Malkias mao ang “prinsipe” niini. (Neh 3:14) Tungod kay gihisgotan ang Tekoa uban sa Bet-hakerem diha sa Jeremias 6:​1, giisip sa pipila nga ang Bet-hakerem nahimutang sa H sa Jerusalem, tali niana nga siyudad ug sa Tekoa. Si Jerome, sa ikaupat nga siglo K.P., naghisgot niining dapita diha sa maong lokasyon ginamit ang ngalang Bethacharma. Uyon niini nga mga panglantaw, gituohan nga ang dapit sa Khirbet Salih (Ramat Rahel) nga 4.5 km (3 mi) sa HHK sa Patukoranan sa Templo mao ang nahimutangan niini. Apan, ang uban wala mag-isip nga ang paghisgot sa Tekoa nagpasabot nga haduol kini sa Bet-hakerem ug sila mipabor nga kini nahimutang sa dapit sa ʽAin Karim (ʽEn Kerem) (nagkahulogang “Tubod sa Parasan”) nga 7.5 km (4.5 mi) sa KHK sa Patukoranan sa Templo. Kini anaa sa usa ka tabunok nga dapit nga may mga kaolibohan  ug mga parasan, ug kini nahimutang diha sa tiilan sa Jebel ʽAli diin gikan sa tumoy niini makita ang Bukid sa mga Olibo nga usa ka bahin sa Jerusalem, ug dapit sa K mao ang Dagat Mediteranyo. Ang dagkong mga bungdo nga bato nga makaplagan sa tayuktok gituohan sa pipila nga gigamit kanhi sa pagpasiga ug mga kalayo ingong timaan sama niadtong gihisgotan ni Jeremias.​—Tan-awa ang BET-CAR.