Ang duha ka lungsod, ang Ibabaw ug Ubos nga Bet-horon, maayong pagkahimutang diha sa karaang ruta gikan sa Jope ug sa patag duol sa dagat paingon sa Walog sa Aijalon hangtod sa Bethel o hangtod sa Gabaon ug Jerusalem. Karong adlawa ang maong mga dapit maoy nahimutangan sa duha ka modernong mga balangay, ang ibabaw: Beit ʽUr el Fauqa (Bet Horon ʽElyon) ug ang ubos: Beit ʽUr et Tahta (Bet Horon Tahton). Sa ingon ang Ibabaw nga Bet-horon nahimutang nga mga 16 km (10 mi) sa AK sa Jerusalem, ug ang Ubos nga Bet-horon maoy 2.5 km (1.5 mi) sa KAK sa Ibabaw nga Bet-horon, nga pulos nahimutang ibabaw sa mga tumoy sa bungtod.

Ang pagtukod (o pagpundar) niining mga dapita gipasidungog sa sinugdan kang Seera, usa ka anak nga babaye o apo nga babaye ni Epraim. (1Cr 7:22-24) Ang mga lungsod nahimong bahin sa habagatang utlanan sa tribo ni Epraim (Jos 16:​3, 5), samtang ang utlanan sa tribo ni Benjamin giingong miabot “sa bukid nga anaa sa habagatan sa Ubos nga Bet-horon.” (Jos 18:​13, 14) Nagpakita kini nga ang duha ka lungsod tukmang nahimutang sulod sa panulondon ni Epraim. Ang Bet-horon, nga tingali usa lamang sa mga lungsod, human niadto gihatag ngadto sa Levihanong mga anak nga lalaki ni Kohat.​—Jos 21:​20, 22; 1Cr 6:68.

Sanglit nahimutang kini diha sa pangunang ruta gikan sa patag nga duol sa dagat paingon sa kabungtoran, kini nga mga lungsod kanunayng giagian sa nakiggubat nga kasundalohan. Sa panahon sa Israelinhong pagpanakop, giparot ni Josue ang lima ka Amorihanong mga hari nga nagkahiusa sa pagpakiggubat sa Gabaon, nga “naggukod kanila agi sa tungasanan sa Bet-horon.” Dinhi gipahinabo ni Jehova ang dagkong ulan nga yelo sa paghampak sa daghang Amorihanon samtang sila nangalagiw agi sa “lugsongong dapit sa Bet-horon.” (Jos 10:6-12) Ang “lugsongong dapit sa Bet-horon” giisip  sa pipila nga nagtumong sa lugsongon nga bahin gikan sa Ibabaw nga Bet-horon paingon sa Ubos nga Bet-horon, sanglit may diperensiya sa gihabogon nga mga 240 m (800 p) tali niining duha ka dapit.

Sa ulahi, sa panahon sa paghari ni Haring Saul, ang “dalan sa Bet-horon” maoy usa sa tulo ka ruta nga giagian sa panon sa mangingilog nga mga Filistehanon nga mihimog mga pagpanulong gikan sa Mikmas. (1Sa 13:16-18) Si Haring Solomon nagtukod o nagpalig-on sa duha ka lungsod pinaagig mga paril, mga pultahan, ug mga trangka, nga sa walay duhaduha nag-isip niini ingong ali batok sa mosulong nga kasundalohan gikan sa Ehipto o sa Filistia. (2Cr 8:5) Si Sisak sa Ehipto, kinsa misulong sa Juda sa panahon sa paghari ni Rehoboam, nagtala sa “Bet-horon” ingong usa sa mga lungsod nga giingong nailog o ubos sa iyang pagmando. (1Ha 14:25; 2Cr 12:2-9) Sa dihang si Haring Amazias sa Juda nagpapauli sa sinuholang kasundalohan nga mga Epraimnon sa wala pa makiggubat sa mga Edomhanon, kini nga sinuholang kasundalohan gikan sa amihanang gingharian, nga ang kaulohan anaa sa Samaria, nagsulong sa Judeanhong mga siyudad hangtod sa Bet-horon tungod sa ilang kasuko nga gipapauli sila.​—2Cr 25:5-13.