[Balay sa Peor].

Sa kataposang tuig sa ilang pagpanaw sa kamingawan, ang nasod sa Israel nagkampo didto “sa walog sa atubangan sa Bet-peor.” (Deu 3:29) Ang Bet-peor lagmit maoy usa ka lungsod nga nahimutang sa mga bakilid sa Peor. Ang bukid ug ang lungsod lagmit nga nalangkit pag-ayo sa pagsimba “sa Baal sa Peor.” Ingon sa gitaho sa Numeros 25:1-9, ang mga Israelinhon nalit-agan sa imoral nga mga rituwal nga nalangkit sa maong pagsimba.​—Tan-awa ang BAAL SA PEOR.

Didto sa Kapatagan sa Moab, sa rehiyon sa Jordan, gihisgotan pag-usab ni Moises ang Balaod ngadto sa Israel, ug human niadto si Moises gilubong “sa walog didto sa yuta sa Moab atbang sa  Bet-peor.” Busa ang Bet-peor mopatim-awng anaa “sa yuta sa Moab,” buot ingnon, sa yuta nga gipuy-an sa mga Moabihanon, apan sa teritoryo nga bag-o pang nakontrolar ni Haring Sihon sa mga Amorihanon, sa ato pa, hangtod nga siya napildi sa nasod sa Israel. (Deu 4:46; 34:6) Sa ulahi kini gipahat ngadto sa tribo ni Ruben, nga gihisgotan uban sa “mga bakilid sa Pisga ug Bet-jesimot.”​—Jos 13:​15, 20.

Kining mga tekstoha pulos nagtumong sa usa ka dapit duol sa AS nga tumoy sa Patayng Dagat ug nag-atubang sa Kapatagan sa Moab. Ang tukmang dapit dili matino. Bisan pa niana, si Eusebius naghisgot nga kining maong dapit maoy mga unom ka Romanhong milya (9 km; 5.5 mi) sa S sa Livias (modernong Tell er-Rameh). (Onomasticon, 48, 3-5) Pinasukad niini ang pipila nagtuo nga kini mao ang Khirbet esh-Sheikh-Jayil nga mga 5 km (3 mi) sa KAK sa gituohang nahimutangan sa Bukid sa Nebo. Kini nga dapit nahimutang sa bakilid sa kinatas-ang bukid nga lagmit mao ang “Peor” diin didto kataposang gidala si Balaam aron tunglohon ang Israel. Kon husto ang maong dapit nga gihisgotan, nan ang “walog atubangan sa Bet-peor” lagmit mao ang Wadi Husban.​—Num 23:28; Deu 4:46; tan-awa ang PEOR.