[Balay sa Plasa (Halapad nga Dapit)].

Dayag nga mao ang ngalan sa usa ka gamay nga Aramaeanhong gingharian, tingali gigamit sa pagtawag ilabina sa pangunang siyudad niini. Diha sa asoy sa pag-atake sa Lais sa 600 ka Danhanon, ang Lais gihubit ingong didto “sa ubos nga patag nga sakop sa Bet-rehob.” (Huk 18:​7, 28) Sa ulahi, sa panahon ni David, ang mga Ammonhanon nagsuhol ug Siryanhong mga sundalo gikan sa Bet-rehob diha sa usa ka kawang nga paningkamot sa pagdepensa sa ilang kaugalingon batok sa kasundalohan sa Israel. (2Sa 10:6) Kini usab gitawag lamang nga “Rehob” (2Sa 10:8) ug busa gituohan nga mao ra usab ang samang dapit nga gihisgotang lakip sa mga dapit nga naabot sa 12 ka Israelinhong mga espiya sa ilang unang pagsusi sa yuta sa Canaan.​—Num 13:21.

Ang paghisgot nga sakop sa Bet-rehob ang “ubos nga patag” nga nahimutangan sa Lais (sa ulahi Dan) ug ang giingon sa Numeros 13:21 nga ang Rehob anaa sa dapit nga paingon sa “pagsulod sa Hamat,” lagmit nagtumong sa usa ka dapit diha sa habagatang bahin sa Walog sa Beqaʽ, nga nahimutang tali sa kabukiran sa Lebanon ug sa Anti-Lebanon. Ang tukmang nahimutangan niini dili matino.