1. Pag-umangkong lalaki ni Abraham, anak sa iyang igsoong lalaki nga si Nahor pinaagi kang Milca. (Gen 22:​20, 22) Si Betuel nanganak kang Rebeca ug Laban. (Gen 22:23; 24:​15, 24, 29) Sa ulahi iyang giila nga ang pagtultol sa Diyos maoy nagdala sa ulipon ni Abraham ngadto sa iyang balay aron mangita ug asawa alang kang Isaac, nga nag-ingon  duyog kang Laban, “Gikan kang Jehova migula kining butanga.” (Gen 24:50) Gitawag siya nga Siryanhon o Aramaeanhon, nga nagpuyo sa kapatagan sa Aram.​—Gen 25:20; 28:​2, 5.

2. Ang usa ka pagtandi sa mga talaan sa kalungsoran diha sa Josue 15:30; 19:4 ug sa 1 Cronicas 4:30 nagpakita nga kining lungsora gitawag usab nga Betul ug Kesil. Nahimutang kini sa habagatang bahin sa teritoryo sa Juda apan gipahat ngadto sa tribo ni Simeon ingong sakop nga siyudad. Busa, lagmit nga kini mao ra usab ang “Bethel” nga gihisgotan sa 1 Samuel 30:27 nga usa sa mga dapit diin si David nagpadala ug mga bahin sa inagaw sa gubat ingong gasa. Gituohan nga lagmit kini mao ang Khirbet el-Qaryatein (Tel Qeriyyot), mga 19 km (12 mi) sa H sa Hebron; apan ang pipila mipalabi sa Khirbet er-Ras (Horvat Rosh) nga mga 24 km (15 mi) dapit sa K niini nga lokasyon.​—Tan-awa ang KESIL.