[lagmit, Kusganon].

Tag-iyag yuta sa Betlehem sa Juda, “usa ka lalaki nga gamhanan tungod sa bahandi” sa mga ika-14 nga siglo W.K.P. (Ru 2:1) Si Boaz mao ang anak nga lalaki ni Salma (Salmon) ug Rahab, ug siya mao ang amahan ni Obed. (Mat 1:5) Lakip siya sa kaliwatan sa banay sa Mesiyas, ang ikapito sa linya sa kaliwat gikan kang Juda. (1Cr 2:3-11; Luc 3:​32, 33) Kon sa unsang paagi nahitabo kining talagsaon kaayong panghitabo, nga nahiapil si Boaz sa talaan sa kagikan ni Jesus, gipreserbar alang kanato sa basahon ni Ruth.

Si Boaz may suod nga paryente nga ginganlag Elimelek, kinsa, uban sa iyang duha ka anak nga lalaki, namatay nga walay gibiling mga anak nga  lalaking manununod. Sa mga balo sa duha ka anak nga lalaki, ang usa, si Ruth, miunong kang Noemi nga balo ni Elimelek. Ting-ani kadto, ug si Ruth nanghagdaw nga “wala-tuyoa” sa yuta nga iya ni Boaz. (Ru 2:3) Si Boaz maoy usa ka tinuod nga Judeanhon, usa ka debotadong magsisimba ni Jehova. Dili lamang kay gipangomosta niya ang iyang mga mag-aani pinaagi sa pag-ingong “Hinaot si Jehova mag-uban kaninyo,” kondili, human maobserbahi ang pagkamaunongon ni Ruth kang Noemi, siya usab miingon kaniya, “Hinaot nga gantihan ni Jehova ang imong gibuhat, ug hinaot nga adunay hingpit nga suhol alang kanimo gikan kang Jehova.” (Ru 2:​4, 12) Sa dihang gipahibalo ni Ruth kining mga butanga ngadto sa iyang ugangang babaye, si Noemi mipatugbaw: “Panalanginan unta siya ni Jehova . . . Siya usa sa atong mga manlulukat.” (Ru 2:20) Dugang pa, sa dihang natapos na ang pag-ani, gisaysay ni Noemi kang Ruth ang naandang paagi aron mahatagag pagtagad ni Boaz kining butanga. Samtang natulog si Boaz sa iyang giokanan, siya nahigmata ug nakita si Ruth nga naghigda dapit sa iyang natukasan ug besti nga mga tiil, nga naghangyo kaniya sa paglukat sa kabtangan ni Elimelek pinaagi sa pagtuman sa kahikayan nga minyoan sa suod nga kabanay ang nabiyudang asawa. (Tan-awa ang KAMINYOON SA BAYAW NGA LALAKI.) Si Ruth mao ang mahimong kapuli ni Noemi, kinsa dili na makapanganak kay tigulang na. Wala maglangan, pagkaugma gipatawag ni Boaz ang laing paryente nga mas suod, apan kini siya, nga giingon lamang sa Bibliya nga si Pulano, midumili sa pagsunod sa kahikayan sa Diyos. Apan si Boaz daling misanong aron sa pagsunod niini ug gipangasawa si Ruth, ug ang ilang mga katagilungsod nagpahayag ug kabulahanan kanila. Siya nanganak kaniya ug usa ka anak nga lalaki nga ginganlag Obed, ang apohan ni Haring David.​—Ru 3:1–​4:17.

Sa tibuok nga asoy, gikan sa iyang unang malulotong pangomosta sa mga mamumuo hangtod sa iyang pagdawat sa responsibilidad aron mapreserbar ang ngalan sa banay ni Elimelek, si Boaz nailhan ingong talagsaon nga tawo​—tawo sa aksiyon ug awtoridad apan puno sa pagpugong-sa-kaugalingon, pagtuo, ug integridad, mahinatagon ug maluloton, hinlo sa moral, ug bug-os nga masinugtanon sa mga sugo ni Jehova diha sa tanang butang.