Usa ka ekspresyon nga makaplagan sa Isaias 14:​13, diin ang hari sa Babilonya gihubit nga nag-ingon sa iyang kasingkasing: “Ibabaw sa mga bituon sa Diyos akong ituboy ang akong trono, ug ako molingkod sa bukid sa panagkatigom, sa kinalay-ang mga bahin sa amihanan.”

Ang pipila ka eskolar nagtuo nga kini nga “bukid sa panagkatigom” maoy usa ka bukid sa halayong amihanan nga giisip sa mga Babilonyanhon ingong pinuy-anan sa ilang mga diyos. Apan, inay nga usa ka tagna sa aktuwal nga pahayag nga himoon sa hari sa Babilonya, ang mga pulong sa Isaias 14:13 nagpakita kon unsa unya ang iyang ambisyon ug tinamdan. (Itandi ang Isa 47:10.) Kini maoy bahin sa usa ka panultihon nga ipahayag sa napasig-uling mga Israelinhon batok sa hari sa Babilonya. (Isa 14:1-4) Busa makataronganon nga ang “bukid sa panagkatigom” angayng sabton pinasukad sa kahayag sa Kasulatan ug dili pinasukad sa kon unsa tingali ang paganong relihiyosong pagtuo sa hari sa Babilonya. Dayag nga ang hari sa Babilonya walay tinguha sa pagtuboy sa iyang trono ibabaw sa mga bituon sa usa ka diyos nga iyang gisimba. Dugang pa, ang Isaias 14:14 tin-awng nagpakita nga ang gitumong dili mao ang usa sa mga diyos sa Babilonya, kondili ang Labing Hataas. Busa ang “bukid sa panagkatigom” angay gayong ilangkit sa Labing Hataas nga Diyos.

Sa panahon ni Isaias diha lamay usa ka bukid, ang Bukid sa Zion (nga ang ngalan niini naglakip sa dapit sa templo sa Bukid sa Moria), diin ang Diyos nakigtagbo sa iyang katawhan pinaagi sa usa ka hawas. (Itandi ang Isa 8:18; 18:7; 24:23; Joe 3:17.) Kini haom nga tawgong “bukid sa panagkatigom” tungod kay sa sangtuwaryo didto, ang tanang hamtong nga Israelinhong mga lalaki moatubang sa nawong ni Jehova katulo sa usa ka tuig. (Ex 23:17) Ang Salmo 48:​1, 2 dugang nagpamatuod niini nga pagsabot sanglit gihisgotan man niini nga ang Bukid sa Zion nahimutang diha sa amihanang dapit, nga nahiuyon sa nahimutangan sa “bukid sa panagkatigom” diha sa “kinalay-ang mga bahin sa amihanan.”