Ang Hebreohanong pulong nga naʹchal mahimong magtumong sa walog nga giagosan sa sapa (Gen 26:19; 2Ha 3:16; Job 30:6; Aw 6:11) o sa sapa mismo. (1Ha 17:4; Sal 110:7) Mahitungod sa pulong nga naʹchal, si A. P. Stanley, diha sa iyang basahon nga  Sinai and Palestine (1885, p. 590), miingon: “Walay Iningles nga pulong ang eksaktong katumbas, apan tingali ang ‘bul-oganang salog’ halos katumbas niini.” Ang usa ka Hebreohanon ug Aramaikong leksikon ni Koehler ug Baumgartner nagtala sa “bul-oganang walog” ingong usa sa mga kahubitan niini. (Lexicon in Veteris Testamenti Libros, Leiden, 1958, p. 607) Ang terminong “wadi” (Arabiko) gigamit usab sa pagpaila sa bul-oganang walog.​—Gen 32:​23, ftn sa Rbi8.

Ang Yutang Saad gihubit nga “usa ka yuta sa bul-oganang mga walog sa tubig, sa mga tubod ug sa halawom nga katubigan nga nagaagay diha sa patag sa walog ug sa bukirong rehiyon.” (Deu 8:7) Ang tubig sa pipila ka sapa naggikan sa mga tubod ug busa permanente, samtang ang ubang mga sapa namugna tungod sa mga bul-og sa tubig sa ting-ulan apan mahurot pagkahubas sa panahon nga walay ulan. (1Ha 17:7; 18:5) Ang matinumanong si Job nagtandi sa pagkamaluibon sa iyang mga igsoon ngadto kaniya ingong usa ka bul-oganang walog sa tingtugnaw nga mohubas sa ting-init.​—Job 6:15.

Lakip sa bul-oganang mga walog nga gihisgotan sa Bibliya mao ang bul-oganang mga walog sa Araba (Am 6:14), Arnon (Deu 2:36), Besor (1Sa 30:9), Kerit (1Ha 17:3), Ehipto (Jos 15:4), Escol (Num 13:23), Gerar (Gen 26:17), Jabok (Deu 2:37), Kana (Jos 16:8), Kidron (2Sa 15:23), Kison (Huk 4:7), Sorek (Huk 16:4), ug Zered (Deu 2:13; tan-awa ang bul-oganang mga walog ilalom sa tagsatagsa ka ngalan niini). Ang ubang bul-oganang mga walog nga wala hisgoti apan pangunang nagaagos ngadto sa Jordan mao ang Yarmuk ug ang Farʽah.