Ang hagkot, likido nga aspalto, usa ka dagtom ug bulok nga sambog sa mga hidrokarbon nga susama nianang sagad nga gitawag ug alkitran. (Tan-awa ang ASPALTO.) Gihubad kini gikan sa Hebreohanong pulong nga zeʹpheth.

Ang mineral nga bulitik daling mosiga ug, kon wala kaayoy hangin, kini baga kaayog aso sa dihang masunog. Ang pagpuno ug bulitik sa kasapaan sa Edom ug ang pagpahinabo sa yuta nga mahimong “nagdilaab nga bulitik” nga ang aso mag-utbo hangtod sa panahong walay tino maoy haom nga hulagway sa grabeng kalaglagan. (Isa 34:​9, 10) Kini nga paghubit motabang usab sa pag-ila sa maong substansiya, kay ang Edom duol sa Patayng Dagat, ug bisan karong adlawa ang aspalto usahay ibanlas diha sa mga baybayon niini, nga dayag naggikan sa mga deposito nga karon natabonan na sa dagat.

Sumala sa Exodo 2:3 ang arka nga papiro nga gitagoan kang Moises gibulitan ug “aspalto ug bulitik.” Ang Hudiyong komentarista nga si Rashi nag-ingon nga mahimong gibulitan kini ug aspalto sa sulod ug bulitik sa gawas. O kini mahimong magtumong sa gisagol nga duha ka matang sa pangbulit nga magkalahi ang kahagkot apan naggikan sa samang pangunang substansiya. Pananglitan, diha sa The Land and the Book, si W. M. Thomson nag-ingon nga ang Exodo 2:3 “naghisgot sa proseso sa paghimo nila ug aspalto. Kini nga mineral, ingon sa makaplagan niining dapita, dali nga matunaw; apan sa dihang kini mobugnaw, kini dali rang mabuak sama sa bildo. Samtang tunaw pa, kini kinahanglang isagol dayon sa alkitran, ug sa ingon kini mahimong gahi, bildohong talo, nga dili gayod matuphan ug tubig.” (Girebisar ni J. Grande, 1910, p. 200) Ang Gregong Septuagint naggamit sa usa lamang ka terminong a·sphal·toʹpis·sa, usa ka sambog sa aspalto ug bulitik. Bisan niining bag-o pang kapanahonan, sa mga bahin sa Tungang Sidlakan ang mineral nga bulitik gigamit ingong pangbulit alang sa pipila ka linayagan nga mga sakayan.