SI Elias maoy usa ka manalagna nga mihagit alang sa usa ka panagtigi sa pagkadiyos didto sa Bukid sa Carmelo. Ang amihanang gingharian nahugawan tungod sa pagsimba kang Baal. Apan si Elias maisogong mihagit sa 450 ka manalagna ni Baal aron pamatud-an kon si Baal ba ang matuod nga Diyos. Ang ilang mabalak-ong pag-ampo sulod sa daghang takna walay nahimo. Unya si Elias nagpahimutang sa iyang halad, nagbasa niini sa tubig sa makadaghang higayon, ug nag-ampo kang Jehova. Sa dihang ang kalayo dihadihang nahulog gikan sa langit, naglamoy sa halad, ug nagtila sa tubig, ang katawhan mipatugbaw: “Si Jehova mao ang matuod nga Diyos!” Niana, gisugo ni Elias nga ang mga manalagna ni Baal pamatyon.​—1Ha 18:18-40.

Bisan pa niana, si Elias nahadlok sa dihang iyang nasayran nga si Rayna Jezebel naglaraw sa pagpatay kaniya. Siya mikalagiw ug mga 150 km (95 mi) ngadto sa Beer-seba ug dayon mipanaw ug laing 300 km (190 mi) ngadto sa Bukid sa Sinai. Wala isalikway ni Jehova si Elias tungod sa iyang temporaryong pagkaluya apan nagpasalig kaniya nga aduna pay dugang buluhatong pagpanagna nga iyang himoon.​—1Ha 19:1-18.

Si Eliseo mao ang manununod ni Elias. Sa dihang gilibotan si Eliseo sa Siryanhong mga karo nga iggugubat, siya adunay hugot nga pagtuo nga ang Siryanhong kasundalohan mao gayod ang tinuod nga gilibotan​—sa usa ka panon sa mga karo sa manulonda!​—2Ha 6:15-17.