Si Jose Caifas mao ang hataas nga saserdote sa panahon sa yutan-ong ministeryo ni Jesus. (Luc 3:2) Siya ang umagad nga lalaki sa Hataas nga Saserdoteng si Anas (Ju 18:13; tan-awa ang ANAS) ug gitudlo sa katungdanan sa gisundan ni Poncio Pilato nga si Valerius Gratus, sa mga tuig 18 K.P., bisan tuod ang pipila nag-ingon nga kini nahitabo sa mas ulahing tuig sa 26 K.P. Iyang gihuptan ang katungdanan hangtod sa mga tuig 36 K.P., nga mas dugay kon itandi sa iyang mga gisundan, tungod kini sa iyang batid nga pamaagi sa diplomasya ug pakigtambayayong sa pagmando sa Roma. Siya ug si Pilato maoy suod nga managhigala. Si Caifas maoy usa ka Saduseo.​—Buh 5:17.

Ingong lider sa laraw sa pagpatay kang Jesus, si Caifas nagtagna, hinuon dili sa iyang kaugalingong pagbulot-an, nga si Jesus sa dili madugay mamatay alang sa nasod, ug siya bug-os kasingkasing nga nagpaluyo sa maong katuyoan. (Ju 11:49-53; 18:12-14) Panahon sa paghusay kang Jesus atubangan sa Sanhedrin, gigisi ni Caifas ang iyang besti ug miingon: “Siya nagpasipala!” (Mat 26:65) Sa dihang si Jesus didto sa atubangan ni Pilato, sa walay duhaduha didto niadtong tungora si Caifas nga nagsinggit: “Ilansang siya! Ilansang siya!” (Ju 19:​6, 11); didto usab siya nga naghangyo nga buhian si Barabas inay si Jesus (Mat 27:​20, 21; Mar 15:11); didto siya nga nagsinggit: “Kami walay hari gawas kang Cesar” (Ju 19:15); didto usab siya nga misupak labot sa karatula nga gibutang sa ibabaw sa ulo ni Jesus: “Ang Hari sa mga Hudiyo” (Ju 19:21).

Ang kamatayon ni Jesus wala magtapos sa papel ni Caifas ingong usa ka pangunang maglulutos sa bag-o pang naporma nga Kristiyanidad. Ang mga apostoles mao ang sunod nga gitaral atubangan niining relihiyosong magmamando; sila hugot nga gibaoran nga mohunong sa ilang pagsangyaw, gihulga, ug gibunalan pa gani, apan kini walay nahimo. Sa “matag adlaw diha sa templo ug sa balay ug balay sila wala mohunong,” bisan pa sa pagsupak ni Caifas. (Buh 4:5-7; 5:​17, 18, 21, 27, 28, 40, 42) Sa wala madugay ang dugo sa matarong nga si Esteban nadugang sa mantsa sa dugo ni Jesus diha sa mga besti ni Caifas, kinsa naghatag usab kang Saulo sa Tarso ug mga sulat sa pagpailaila aron nga ang kampanya sa pagbuno ikapaabot sa Damasco. (Buh 7:​1, 54-60; 9:​1, 2) Apan, wala madugay human niadto si Vitellius, usa ka Romanong opisyal, nagtangtang kang Caifas gikan sa katungdanan.