Sa mga adlaw sa mga apostoles, ang Capadocia maoy usa ka dakong ilaya nga rehiyon sa sidlakang bahin sa Asia Minor, nga sa katibuk-an adunay bugnaw nga klima ug medyo hilang ang kakahoyan. Kini nahimutang sa usa ka patag ibabaw sa bukid nga may gihabogon nga 900 m (3,000 p) diha sa kinadak-ang bahin sa rehiyon. Bisan tuod nga ang mga utlanan nagbag-obag-o latas sa kasaysayan niini, sa panguna kini mao ang Ponto dapit sa A, ang Galacia ug Licaonia sa K, ang Cilicia ug ang Kabukiran sa Taurus sa H, ug ang Armenia ug ang ibabaw nga bahin sa Suba sa Euprates sa S. Daghang karnero ang gipamuhi didto, ug daghan usab ang mga baka ug maayog klase nga mga kabayo. Ang trigo mao ang pangunang produkto nga lugas.

Ang Capadocia gihimong bahin sa Imperyo sa Persia ilalom ni Ciro ug ang orihinal nga rehiyon gihimong duha ka dapit, ang Ponto ug Capadocia nga gimandoan ang matag usa sa usa ka satrapa. Sa panahon sa Seleucid nga dinastiya sa Sirya, ang mga hari nga tighatag ug tributo gitugotan sa pagmando. Si Emperador Tiberio sa Roma nagtapos niini niadtong 17 K.P., ug ang Capadocia nahimong usa ka Romanhong lalawigan ilalom sa pagdumala sa usa ka prokurador. Gipadak-an ni Vespasian ang lalawigan niadtong 70 K.P., nga nag-usa niini uban sa Armenia, sa ingon nahimo kining usa ka pangunang lalawigan diha sa utlanan sa Sidlakan. Ang Capadocia hinungdanon kaayo tungod sa mga dalan nga milatas sa rehiyon, usa niini ang milatas gikan sa Tarso sa Mediteranyo, agi sa kal-ang diha sa Kabukiran sa Taurus nga nailhang Mga  Ganghaan sa Cilicia, tabok sa Capadocia ngadto sa lalawigan sa Ponto, ug ngadto sa mga pantalan sa Itom nga Dagat.

Ang mga lumad sa Capadocia dayag nga maoy mga Aryanhon nga kaliwat ni Japet, apan ang mga kabalangayan sa mga Hudiyo makaplagan na sa ikaduhang siglo W.K.P. Ang mga Hudiyo gikan sa Capadocia didto sa Jerusalem niadtong Pentekostes sa 33 K.P. (Buh 2:9) Lagmit nga tungod niini, ang Kristiyanidad sayo nga mikaylap sa Capadocia, ug ang mga Kristohanon sa Capadocia nalakip niadtong gihisgotan ni Pedro sa iyang unang sulat.​—1Pe 1:1.