Usa ka anak o katawhan nga naggikan kang Mizraim, ang anak nga lalaki ni Ham. Ang rekord sa Bibliya nagpakita nga sa mga Casluhim “nagagikan ang mga Filistehanon.” (Gen 10:​6, 13, 14; 1Cr 1:​8, 11, 12) Sanglit ang ubang mga teksto naghisgot sa mga Filistehanon nga naggikan sa Captor o Creta (Jer 47:4; Am 9:7), ang pipila ka eskolar nagtuo nga kini nga prase angay nga ibalhin human sa kataposang ginganlan nga kaliwat ni Mizraim, ang mga Captorim. Apan, dili kinahanglang hunahunaon nga dunay panagsumpaki niining mga tekstoha. Ang rekord sa Genesis (nga pareho nianang sa Mga Cronicas) maoy sumala sa talaan sa kagikan. Ang ubang mga paghisgot sa mga Filistehanon ingong naggikan sa Captor lagmit maoy geograpikanhon, nga nagpakita nga sila milalin gikan sa teritoryo sa mga Captorim.

Ang mga Casluhim dili makita sa ubang mga teksto sa Bibliya ug wala maghatag ug pihong timailhan diha sa sekular nga kasaysayan. Gawas nga sila naggikan sa Mizraim, kansang ngalan maoy katumbas sa Ehipto sa kapanahonan sa Bibliya, wala nay impormasyon nga magpakita kon diin sila namuyo.