[Heb., chasi·dhahʹ].

Ang ngalan niini nga langgam maoy feminine form sa Hebreohanong pulong alang sa “maunongon; usa nga nagbaton ug mahigugmaong-kalulot.” (Itandi ang 1Sa 2:9; Sal 18:​25, ftn sa Rbi8.) Kini nga kahubitan haom kaayo sa cigueña, sanglit kini nailhan nga malumong moatiman sa iyang piso ug maunongon sa iyang kaparis sa tibuok kinabuhi.

Ang cigueña maoy usa ka dako, taas-ug-tiil, tig-ubog sa tubig nga langgam sama sa ibis ug talabong. Ang puting cigueña (Ciconia ciconia) may puti nga mga balhibo gawas lang sa iglulupad nga mga dagang sa mga pako niini nga maoy sinawng itom. Ang hingkod nga cigueña mobarog ug hangtod sa 1.2 m (4 p), ang gitas-on sa lawas duolan sa  1.2 m (4 p), ug ang mga pako niini may talagsaong bukhad nga moabot ug 2 m (6.5 p). Ang taas ug pula nga sungo niini, nga lapad sa punoan ug talinis kaayo ang tumoy, gigamit sa cigueña sa pagpangita ug mga baki, isda, o gagmayng mga reptilya diha sa kalapokan. Gawas pa sa gagmayng mga linalang diha sa katubigan, kini mokaon usab ug mga apan-apan ug mga dulon ug usab sa patayng mga hayop ug mga basura. Ang cigueña gilakip sa talaan sa mahugaw nga mga linalang, nga sumala sa pakigsaad sa Balaod, dili mahimong kan-on sa mga Israelinhon.​—Lev 11:19; Deu 14:18.

Sa dihang gibadlong ang apostatang katawhan sa Juda kinsa wala mahibalo sa panahon sa paghukom ni Jehova, ang manalagnang si Jeremias nagtawag sa ilang pagtagad ngadto sa cigueña ug sa uban pang mga langgam nga ‘nahibalo pag-ayo sa ilang tinudlong kapanahonan.’ (Jer 8:7) Ang cigueña regular nga molalin latas sa Palestina ug Sirya gikan sa Aprika nga maoy puy-anan niini sa tingtugnaw, ug kini makita nga magpanon nga tinagdaghan panahon sa Marso ug Abril. Sa duha ka matang sa cigueña nga makaplagan sa Israel, ang puting cigueña ug ang itom nga cigueña (Ciconia nigra), ang puting cigueña lamang ang magpabilin sa popanahon aron magpaliwat didto sa maong rehiyon, nga sagad magsalag diha sa mga kahoy ug usab sa mga tinukod nga hinimo sa tawo. Ang itom nga cigueña, nga gitawag sa ingon tungod sa itom nga ulo, liog, ug likod niini, mas komon diha sa mga walog sa Hula ug Bet Sheʼan ug kini mangitag mga kahoy aron maghimog salag. Ang salmista naghisgot sa mga cigueña nga nagsalag diha sa taas nga mga kahoyng junipero.​—Sal 104:17.

Sa pagtandi sa dili-makalupad nga ostrik ngadto sa taas-ug-lupad nga cigueña, si Jehova nangutana kang Job: “Ang pako ba sa baye nga ostrik nagkapakapa sa kalipay, o siya ba may mga pako ug mga balhibo sa cigueña?” (Job 39:13) Ang mga dagang sa cigueña maoy lagpad kaayo ug lig-on, ang segundaryo ug ikatulong mga balhibo halos pareho ang gitas-on sa pangunang mga balhibo, nga nagpalapad pag-ayo sa pako ug magpaarang sa cigueña sa paglupad sa habog ug sa layong distansiya nga walay hunonghunong. Madanihon kaayong tan-awon ang cigueña nga naglupad sa itaas pinaagi sa kusgang mga pako niini, nga tul-id ang liog ug ang tag-as nga mga tiil gituy-od. Ang duha ka babaye nga nakita sa panan-awon ni Zacarias (Zac 5:6-11) nga nagdalag ephah nga gisudlan sa babaye nga gitawag ug “Pagkadaotan” gihubit ingong may “mga pako nga sama sa mga pako sa cigueña.” Ang paghisgot sa “hangin diha sa ilang mga pako” (ber 9) mohaom usab sa hinaguros sa hangin nga moagi sa mga dagang sa cigueña. Ang pangunang mga balhibo gipakangkang sa dihang kini molupad aron adunay mga kal-ang tali sa mga dagang sa tumoy sa mga pako, sa ingon makontrolar ang hangin nga moagi ibabaw sa mga pako ug makadugang sa ilang kusog sa pag-isa.