Ikaupat nga emperador sa Roma; anak nga lalaki ni Drusus nga igsoong lalaki ni Tiberio, ug uyoan ni Caligula, kinsa iyang gisundan sa trono niadtong 41 K.P. Si Claudio dili kaayo lig-on sa pisikal o sa determinasyon, ug bisan tuod siya interesado sa kasaysayan, mga sinulat, ug ubang akademikong kalihokan, ang mga gipulihan niya nagtuo nga siya walay igong katakos sa salabotan aron mohupot sa gahom ug busa mipabor sa uban ingong mga manununod. Apan, sa panahon sa kaguliyang nga nahitabo human sa pagpatay kang Caligula, ang Praetorianong Guwardiya midaog ug miproklamar kang Claudio ingong Emperador. Usa sa iyang mga tigpaluyo niini nga panagbisogay sa gahom mao si Herodes Agripa I, nga gigantihan ni Claudio pinaagi sa paglig-on sa iyang pagkahari ug sa pagdugang sa Judea ug Samaria sa iyang gingharian. Nakuha usab ni Claudio ang pabor sa Senado. Ang iyang ikaupat nga asawa gitahong naghilo kaniya pinaagig mga uhong niadtong 54 K.P., sa ika-14 nga tuig sa iyang paghari. Human niana si Nero mipuli sa gahom.

“Usa ka dakong gutom . . . sa tibuok gipuy-ang yuta” ang gitagna ni manalagnang Agabo, “ug tuod man, nahitabo kini sa panahon ni Claudio.” Kini nagpalihok sa mga Kristohanon sa Antioquia sa ‘paghimog pag-alagad pinaagig pagpadala ug hinabang’ alang sa ilang mga igsoon sa Jerusalem ug Judea. (Buh 11:27-30) Ang maong gutom sa Palestina sa panahon sa paghari ni Claudio gitawag ni Josephus (Jewish Antiquities, XX, 49-53 [ii, 5]; XX, 101 [v, 2]) nga “dakong gutom,” ug gipetsahan sa mga 46 K.P.

“Si Claudio nagsugo sa tanang Hudiyo nga mobiya sa Roma,” nga nagpagula sa iyang mando niadtong 49 o sa sayong bahin sa 50 K.P., sa ikasiyam nga tuig sa iyang paghari. Ang Romanong biograpo ug historyador nga si Suetonius nagpamatuod sa paghingilin ni Claudio sa mga Hudiyo gikan sa Roma. (The Lives of the Caesars, Claudio, XXV, 4) Ingong sangpotanan niining mando sa pagpapahawa, duha ka Kristohanong Hudiyo, si Aquila ug Priscila, mibiya sa Roma paingon sa Corinto, diin wala madugay human sa ilang pag-abot ilang nahibalag si apostol Pablo sa pag-abot niya didto lagmit sa tinghunlak sa tuig 50 K.P. (Buh 18:1-3) Sa sinugdanan sa iyang paghari, si Claudio nagpakitag pabor sa mga Hudiyo, nga nagmando pa gani nga magmatugoton kanila ug naghatag kanilag daghang kagawasan sa tibuok imperyo. Apan, mopatim-awng daghang Hudiyo sa Roma ang magubtanon, nga maoy nakaingon sa pagpapahawa ni Claudio kanila gikan sa siyudad.